Gabon: Urukiko rugiye gusuzuma ubusabe ku mpungenge z’ubuzima bwa Perezida Bongo

Yanditswe na Sekamana Mathias
Kuya 13 Kanama 2019 saa 10:23
Yasuwe :
0 0

Urukiko rwo muri Gabon rwatangaje ko kuwa 26 Kanama ruzumva ubusabe bw’uko Perezida Ali bongo Ondimba, yakorerwa isuzuma hakarebwa niba ubuzima bwe bumeze neza ku buryo yakomeza kuyobora igihugu.

Impaka k’ubuzima bwa Perezida Bongo zatangiye mu Ukwakira umwaka ushize ubwo yarwariraga muri Arabia Saudite. Ni nyuma yo kurwara indwara zifitanye isano n’umunaniro ukabije.

Yasubiye muri Gabon muri Werurwe uyu mwaka nyuma yo kuvurirwa muri Maroc, ariko ntaragaragara na rimwe avuga ijambo haba kuri televiziyo cyangwa mu ruhame.

Muri Werurwe uyu mwaka, abantu icumi bo mu mashyaka atavuga rumwe n’ubutegetsi, sosiyeti sivile n’ihuriro ry’abacuruzi batanze ubusabe mu nyandiko bw’uko Perezida Bongo yakorerwa isuzuma hakarebwa niba agifite ubuzima bwatuma akomeza kuyobora igihugu.

Urukiko rw’ibanze rwatesheje agaciro icyo kirego muri Gicurasi uyu mwaka ruvuga ko inteko ishinga amategeko imitwe yombi ndetse n’urukiko rukuru rugenzura iyubahirizwa ry’itegeko nshinga ari zo zonyine zifite ubwo bubasha kandi nabwo zibisabwe na guverinoma.

Gusa urukiko rw’Ubujurire kuri uyu wa Mbere rwatangaje ko ruzumva iki kirego ndetse rushyiraho n’itariki bizakorerwa ari yo kuwa 26 Kanama 2019.

Ali bongo Ondimba w’imyaka 60 yagiye ku butegetsi asimbuye se Omar Bongo wayoboye Gabon kuva mu 1967 kugeza apfuye m 2009.Byagiye bivugwa ko ingoma ye yaranzwe na ruswa ikabije.

Umwe mu banyamategeko uri mu batanze ikirego, Anges Kevin Nzigou, yavuze ko umwanzuro watangajwe ejo kuwa mbere ari intangiriro z’ikintu gikomeye.

Ati "Ubwa mbere ubutabera bubitegetswe na perezida bwatesheje agaciro ubusabe bwacu.”

Umunyamategeko wa Perezida Bongo, Tony Serge Ndong, yavuganye uburakari ko icyo kirego kinyuranyije n’amategeko yose, ko Bongo nka perezida adashobora kujyanwa mu rukiko.

Urukiko rugiye gusuzuma niba Perezida Bongo yakorerwa ibizamini byerekana ko afite ubushobozi bwo kuyobora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza