Gabon: Jean Ping watsinzwe amatora yitabaje inkiko

Yanditswe na Ishimwe Israel
Kuya 9 Nzeri 2016 saa 03:47
Yasuwe : XX
0

Jean Ping uherutse gutsindwa amatora y’umukuru w’igihugu muri Gabon ariko agatangaza ko ari we watsinze bityo akaba ari we Perezida, yamaze kugeza ikirego cye mu rukiko asaba ko rwatesha agaciro intsinzi ya Ali Bongo Ondimba bari bahanganye, amatora agasubirwamo.

Jean Ping yashyikirije ikirego cye Urukiko rushinzwe kubungabunga Itegeko Nshinga kuri uyu wa Kane tariki ya 8 Nzeli 2016.

Ibyo bibaye mu gihe hari hamaze iminsi havugwa mu bitangazamakuru ko impande zombi (uwatsinze n’uwatsinzwe) bamaganye ibyavuye mu matora, Jean Ping akavuga ko hakozwe uburiganya mu kubarura amajwi, mu gihe Ali Bongo na we yavugaga ko yibwe amajwi mu duce tumwe na tumwe.

Jeune Afrique dukesha iyi nkuru itangaza ko Jean-Gaspard Ntoutoume wari ukuriye ibikorwa byo kwiyamamaza bya Jean Ping yavuze ko mu Ntara ya Haut-Ogooué, uwo mugabo wigeze kuba Umuyobozi wa Komisiyo y’Umuryango wa Afurika Yunze Ubumwe akomokamo, ubwitabire bw’amatora bwageze kuri 99,98% .

Kuva hamara gutangazwa ibyavuye mu matora, Uruhande rwa Jean Ping utavuga rumwe n’ubutegetsi ntirwahwemye gusaba ko ibarura ry’amajwi ryasubirwamo kuri buri biro by’itora mu Ntara zimwe na zimwe.

Jean Ping ngo yari yaratinye kuregera urwo rukiko kubera kutizera ko yazahabwa ubutabera bunoze.

Ku ruhande rwa Ali Bongo watsinze amatora ho bavuga ko na bo bibwe amajwi, cyane cyane mu Ntara ya Woleu-Ntem, bityo ayatangajwe akaba ari make ku yo bahakuye nk’uko bitangazwa na Alain-Claude Bilie By Nze, Umuvugizi wa Perezida Ali Bongo.

Kuwa Gatandatu tariki ya 27 Kanama ni bwo muri Gabon habaye amatora y’umukuru w’igihugu, Ali Bongo Ondimba yegukana intsinzi n’amajwi ayingayinga 49,80% mu gihe Jean Ping bari bahanganye yabonye 48,23%.

Kuwa 3 Nzeli, Jean Ping yari yatangaje ko ari we Mukuru w’Igihugu, mu gihe Perezida Ali Bongo we akomeje imyiteguro yo kongera kurahirira uwo mwanya.

Jean Ping(ibumoso) avuga ko habaye uburiganya mu kubarura amajwi mu matora yatsinzwe na Ali Bongo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza