Kwamamaza

Gabon: Jean Ping watsinzwe amatora yahamagariye abaturage kwigaragambya

Yanditswe kuya 7-09-2016 saa 11:55' na Niyonsenga Schadrack


Umuyobozi w’ishyaka ritavuga rumwe n’ubutegetsi muri Gabon, Jean Ping yasabye abayoboke be kwigaragambya kubera ibyo yita ubujura mu kongera gutorwa kwa Ali Bongo nk’Umukuru w’Igihugu.

Iyi myigaragambyo itangajwe mu gihe Perezida Ali Bongo yari atangiye gahunda yo gusubiza ibintu mu buryo nyuma y’imvururu zadutse kuva kuwa gatatu taliki ya 31/08/2016 ubwo Komisiyo y’amatora yatangazaga ko Perezida Bongo ariwe watorewe kuyobora Gabon.

Jean Ping, wigeze kuyobora Komisiyo y’umuryango wa Afurika Yunze Ubumwe, watangajwe nk’uwatsinzwe amatora , kuri ubu yemeza ko ari we muyobozi wa Gabon, kubwe ngo intambara nibwo igitangira ndetse asaba abanya-Gabon kwirara mu mihanda guhera ku munsi w’ejo kuwa Mbere bamagana ibyavuye mu matora.

Yagize ati “ Ndabasaba guhera uyu munsi kutagira uwo muhohotera, ahubwo mukomeze gufunga ubukungu bw’igihugu. Ndabasaba guhagarika ibikorwa byose ahubwo mugatangira imyigaragambyo.”

Kugeza ubu abantu bagera kuri batandatu nibo bamaze kwicirwa mu mvururu zakurikiye amatora muri Gabon naho abarenga 1000 batawe muri yombi kubera ibikorwa byo guhohotera abantu.

Umwe mu bajyanama ba Minisiteri y’Umutekano w’imbere mu gihugu yatangarije Reuters ko kuva kuwa Gatandatu bamwe mu baturage bari batawe muri yombi batangiye kurekurwa , ariko abatuye mu murwa mukuru Libreville babwiye iki kinyamakuru ko hari abantu babo baburiwe irengero kuva imvururu zatangira.

Ubuyobozi bwa Gabon yakolonijwe n’u Bufaransa batangaje ko kuri ubu icyo bushyize imbere ari ugushakira abaturage umutekano.

Nubwo muri Gabon habarurwa Abafaransa bagera ku bihumbi 14 ndetse n’ibirindiro birimo ingabo z’Abafaransa 450, Minisitiri w’Ububanyi n’Amahanga mu Bufaransa, Jean-Marc Ayrault aherutse gutangaza ko u Bufaransa budafite amakuru ahagije ku biri kubera muri iki gihugu.

Umutekano muri Gabon uracyateye inkeke

Amerika, Umuryango w’Ubumwe bw’u Burayi ndetse n’u Bufaransa basabye ko amajwi yasubirwamo akabarurwa mu mucyo ariko Guverinoma ya Gabon yabiteye utwatsi kugeza n’aho Minisitiri w’Ubutabera muri iki gihugu, Seraphin Moundounga yahisemo kwegura ku mirimo ye.

Mu ijambo yavuze asezera Seraphin Moundounga yabwiye RFI ati "Ubwo gusubiramo ibarura ry’amajwi byanzwe igihugu cyongeye gusubira mu mvururu zikomeye, umutekano w’abenegihugu uri mu kaga.”

Icyakora kuri ubu mu duce tumwe na tumwe tw’igihugu ibintu biri kugenda bisubira mu buryo, imodoka zongeye kugenda mu mihanda ndetse n’abantu bamwe basubiye mu mirimo yabo nubwo hari abandi batarizera umutekano ngo basubire mu kazi.

Uwitwa Hortense Toulangoye ukorera leta yabwiye Reuters ko adashobora gusubira mu kazi mu gihe ibintu bitarasubira mu murongo mwiza.

Yagize ati "Jean Ping ntiyambuza kujya ku kazi, mu gihe ibintu bitaragenda neza sinzava mu rugo.”

Undi mukozi utatangajwe izina yatangaje ko nta makuru yamenye ajyanye n’imyigaragambyo yategurwaga.

Kuri ubu imirongo ya internet yasubijweho nyuma y’iminsi itanu idakora gusa imbuga nkoranyambaga zo ziracyafunze.

Inganda zitunganya ibikomoka kuri peteroli mu gihugu zasubukuye imirimo. Gabon ubusanzwe itunganya ingunguru za Peteroli 200,000 ku munsi nk’uko bitangazwa n’ikigo mpuzamahanga gishinzwe ingufu.

Gabon ibarirwa mu bihugu bikize cyane ku mugabane wa Afurika, aho umusaruro mbumbe w’ibikomoka imbere mu igihugu ugera ku madolari y’ Amerika 10 000 ku mwaka.

Mu myaka yabanje, Gabon yari ifitanye umubano mwiza n’u Bufaransa ubwo yayoborwaga na Omar Bongo ariko kuva yapfa agasimburwa n’umuhungu we Ali Bongo mu mwaka wa 2009, uyu mubano wagiye ugabanuka ku buryo bugaragara.

Jean Ping, utavuga rumwe na Leta yemeza ko ari we watsinze amatora muri Gabon
Imvururu zakurikiye amatora y’Umukuru w’igihugu muri Gabon zimaze kugwamo abagera kuri batandatu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved