Kwamamaza

Gabon: Jean Ping ntakozwa ibiganiro na Ali Bongo

Yanditswe kuya 16-11-2016 saa 21:18' na Philbert Hagengimana


Jean Ping watsinzwe amatora mu guhatanira umwanya w’Umukuuru w’igihugu yateye utwatsi ibiganiro byatumijwe na Perezida Ali Bongo, mu gihe bamwe mu batavuga rumwe n’ubutegetsi babishyigikiye, bikaba byatumye bacikamo ibice.

RFI dukesha iyi nkuru itangaza ko kuva kuwa 14 Ugushyingo, muri Gabon hari hatangiye imyiteguro y’ibiganiro byasabwe na Perezida Ali Bongo, bigomba guhuza leta y’icyo gihugu n’abatavuga rumwe na yo.

Jean Ping urusha amaboko abandi batavuga rumwe n’ubutegetsi bwa Ali Bongo, yahakanye avuga ko adateze kwitabira ibyo biganiro ngo abihuriremo n’Umukuru w’igihugu wabyiteguriye ubwe, gusa ibyo akaba atabibona mu ndorerwamo imwe na Casimir Oye Mba wahoze ari Ministiri w’Intebe na we utavuga rumwe n’ubutegetsi.

Casimir Oye Mba avuga ko kuba yakwiyunga kuri Jean Ping ngo bavire inda imwe ubutegetsi bwa Ali Bongo bidasobanuye ko baba basangiye umurongo w’ibintu byose, ari na yo mpamvu we yasabye ko habaho ikiganiro cya gatatu kizaba gikubiyemo ibyavuye mu biganiro bibiri bya mbere, birimo icy’uruhande rwa Leta n’icy’uruhande rw’abatavuga rumwe na yo.

Akomeza avuga ko Abatavuga rumwe n’ubutegetsi nta yandi mahitamo bafite mu gihe baba bashaka ko ibyo basaba byubahirizwa.

Umunyamabanga wungirije w’Ubumwe bw’Abana Gabon, Paul-Marie Gondjout, avuga ko ibyo abatavuga rumwe n’ubutegetsi basaba bibangamye, akavuga ko Jean Ping yafashe icyemezo gihabanye n’amabwiriza y’umudendezo w’igihugu, ibyo abanya Gabon bakaba batabyiyumvisha.

Paul-Marie Gondjout akomeza avuga ko Casimir Oye Mba akwiye kuryozwa kuba yaravuze ko ntawe ugomba kuganira na Ali Bongo kuko yakoze uburiganya n’ibindi byaha.Yakomeje avuga ko adasabira uwo mugabo utavuga rumwe n’ubutegetsi kuzahezwa muri ibyo biganiro, ariko ngo yamusabira gusubizwa mu murongo kuko asa n’uwatannye.

Jean-Gaspard Ntoutoume Ayi, umwe mu bagize Ubumwe bw’Abaturage ba Gabon avuga ko adatunguwe n’ibyasabwe na Casimir Oye Mba kuko asanzwe avuga ibyo yishakiye, ariko ngo ibyo yasabye byaganiriweho mu batavuga rumwe n’ubutegetsi kandi biteshwa agaciro.

Alexandre Barro Chambrier undi wo ku ruhande rw’abatavuga rumwe n’ubutegetsi yavuze ko Casimir Oye Mba akwiye kugaragaza neza igitekerezo cye nta kugica ku ruhande, kuko kuri we ngo nta wukwiye kuganira na Ali Bongo atabanje kwemera intsinzi ya Jea Ping mu matora y’umukuru w’igihugu.

Kuri we kandi ngo icy’ingenzi ni uko abatavuga rumwe n’ubutegetsi bakomeza gushyira hamwe, cyane ko ibihe bagezemo bitoroshye kuko bitegura amatora y’Abagize Inteko Ishinga Amategeko ateganyijwe mu Ukuboza, bityo ibyo biganiro Leta itumiza bikaba bishobora gukoma mu nkokora ihuriro ry’amashyaka atavuga rumwe n’ubutegetsi ryashinzwe mu mezi atatu ashize.

Jean Ping(hagati), Guy Nzouba Ndama (ibumoso) na Casimir Oye Mba (iburyo)

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved