Kwamamaza

Gabon: Ali Bongo yarahiriye kuyobora indi manda y’imyaka irindwi

Yanditswe kuya 27-09-2016 saa 21:47' na Jean Louis Uwishyaka


Perezida wa Gabon, Ali Bongo, yarahiriye kuyobora iki gihugu muri manda ya kabiri y’imyaka irindwi iri imbere.

Uyu muhango wabaye kuri uyu wa Kabiri tariki 27 Nzeri 2016, aho witabiriwe n’abanyacyubahiro batandukanye barimo Perezida wa Mali Ibrahim Boubacar Keïta, uwa Togo Faure Gnassingbé, Mouhamadou Issoufou wa Niger ndetse na Perezida wa Sao Tomé et Principe.

Uretse aba bakuru b’ibihugu bitabiriye uyu muhango, hari n’ibindi bihugu byohereje intumwa zabyo, birimo Congo, Maroc, Centrafrique, Tchad, Cameroun, Sénégal na Guinée-Équatoriale.

Uyu muhango wabereye mu ngoro y’Umukuru w’Igihugu, wanitabiriwe n’abantu bane batavuga rumwe n’ubutegetsi ndetse n’intumwa z’Umuryango w’Ibihugu by’u Burayi muri iki gihugu nk’uko BBC ibitangaza.

Perezida Bongo arahiriye kuyobora igihugu mu gihe abatavuga rumwe na we barimo Jean Ping bari bahanganye mu matora yabaye ku wa 27 Kanama 2016, batemera amajwi aherutse gutangazwa n’urukiko rurengera Itegeko Nshinga muri iki gihugu, bavuga ko bibwe amajwi.

Urukiko rwasubiyemo ibarura ry’amajwi nyuma y’uko Jean Ping n’abo ku ruhande rwe basabye ko habarurwa amajwi bundi bushya bitewe n’uko bemezaga ko ari bo begukanye aya matora.

Ku wa Gatanu w’icyumweru gishize, uru rukiko rwatangaje ko amatora yegukanywe na Ali Bongo n’amajwi 50.66% na ho Jean Ping agira amajwi 47.24%.

Mbere ibyavuye mu matora yabaye ku wa 27 Kanama, Komisiyo yari yatangaje ko Ali Bongo w’imyaka 57 yatsinze amatora n’amajwi 49, 80% mu gihe Jean Ping bari bahanganye yamuguye mu ntege n’amajwi 48, 23%.

Ibyatangajwe n’uru rukiko kandi byamaganywe n’ibihugu n’imiryango y’amahanga bavuga uru rukiko rwaranzwe no kubogamira kuri Ali Bongo.

Ali Bongo yaherukaga gutorerwa kuyobora Gabon mu mwaka wa 2009, ubwo yasimburaga se Omar Bongo wari umaze kwitaba Imana.

Perezida Bongo yarahiriye kuyobora Gabon muri manda ya kabiri

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved