Gabon:Ali Bongo yahakanye uruhare mu mvururu zakurikiye amatora

Yanditswe na Kanamugire Emmanuel
Kuya 10 Nzeri 2016 saa 06:39
Yasuwe : XX
0

Perezida wa Gabon uherutse gutsinda amatora Ali Bongo Ondimba yatangaje ko nta ruhare na rumwe yigeze agira mu mvururu zateje ibibazo by’umutekano muke bimaze iminsi bibera muri icyo gihugu, nyuma y’amatora yari ahanganiyemo na Jean Ping.

Izo mvururu zakurikiye ayo matora ubwo Jean Ping yatangazaga ko yatsinze amatora, komisiyo ibishinzwe igatangaza ko atari we watsinze ahubwo hatsinze Ali Bongo.

Jeune Afrique yatangaje ko Bongo yabwiye Ibiro Ntaramakuru by’Abafaransa(AFP) ko nta kibazo na kimwe yigeze ateza muri icyo gihugu ahubwo ko byose byabazwa Ping bari bahanganye.

Yagize ati « Sinigeze nkora cyangwa ngo mbe imbarutso y’imvururu.”

Yakomeje avuga ko ibibazo byabaye birimo kwigaragambya, gusahura n’ibindi byatejwe na Jean ping bari bahanganye, nyuma yo kubeshya ko yatsinze amatora.Yatangaje ko nta kiganiro na kimwe yari yongera kugirana na ping kuva ibyo bibazo byavuka, ariko ngo si amakosa ye kuko atigeze amusaba kuganira ngo abyange.

Ati “ Nifuje amatora aciye mu nzira za demokarasi, aciye mu mucyo, sinigeze nyura mu nzira zitemewe.”

Bongo yavuze ko yabonye ko hari umubare munini w’abantu bamutoye n’abandi batamutoye, ariko ngo ntibizamubuza kubayobora neza.

Jean Ping aherutse gutanga ikirego imbere y’urukiko rurinda Itegeko Nshinga ko mu Ntara ya Haut-Ogooué, aho umuryango w’aba Bongo uvuka, Bongo yahabonye amajwi 95% , akavuga ko atabyemera, bikwiye gusuzumwa, amajwi akongera kubarurwa bundi bushya, kuko ngo bizerekana n’ahandi hose haba harabaye ikibazo.

Bongo abajijwe ku bijyanye n’ingabo z’Abafaransa zagiye kugarura amahoro muri icyo gihugu, yavuze ko bidakwiye kuko ngo na bo bafite ubushobozi bwo kugarura umwuka mwiza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza