00:00:00 IGIHE NETWORK KN KINYARWANDA EN ENGLISH FR FRANCAIS

FW de Klerk yasize asabye imbabazi ku byaha bya Apartheid mbere y’uko yitaba Imana

Yanditswe na Ndahayo Emmanuel
Kuya 11 Ugushyingo 2021 saa 07:40
Yasuwe :
0 0

KW de Klerk wabaye Perezida wa Afurika y’Epfo kuva mu 1989 kugera mu 1994, yongeye gusaba imbabazi ku byaha bya Apartheid, byabaye muri icyo gihugu mu kuva mu ntangiriro z’ikinyejana kugera mu 1994.

Uyu mugabo witabye Imana mu gitondo cyo kuri uyu wa Kane, yasabye imbabazi agira ati “Nibyo ko mu buto bwanjye nashyigikiye Apartheid.”

Apartheid cyari igihe abirabura bari bakandamijwe n’abazungu bayobora Afurika y’Epfo, igihugu bajemo ari abashyitsi ariko bakagishima bakanagitura, bikarangira babaye abanyagihugu mbere y’uko bahindukira ngo bashake kwigwizaho umutungo wacyo, ari nako bakandamiza ba abirabura.

Muri ibyo bihe, abazungu bigwijeho imitungo irimo amafaranga n’indi nk’ubutaka, mu gihe abirabura biciraga isazi mu jisho, bakoreshwa imirimo y’agahato, bagahohoterwa, bagafungwa ndetse bakanabuzwa amahirwe arimo kubona uburezi n’ibindi.

Klerk ashimirwa cyane ku ruhare yagize mu kurangiza iyi politiki, kuko ubwo yafataga ubutegetsi mu 1989, yavuze ko amashyaka y’abirabura yari yarambuwe ijambo muri Afurika y’Epfo, ahabwa uburenganzira bwo gukora, ndetse mu mwaka wakurikiyeho, ategeka ko Nelson Mandela wari umaze imyaka 27 muri gereza, afungurwa.

Mu gihe cy’imyaka ine yakurikiyeho, Klerk yagize uruhare mu biganiro byaje kugeza Mandela ku butegetsi, anabukoramo ari umwe muri ba Visi Perezida bamwungirije kuva mu 1994 kugera mu 1996, umwaka umwe mbere y’uko asezera kuri politiki ku cyo yitaga inyungu z’igihugu.

Uyu mugabo watabarutse ku myaka 85 azize Kanseri ifata ibihaha, igaterwa n’utuvungukira twa Asbestos, yakunze kuvuga ko ibyakozwe n’ubutegetsi bw’abazungu mu bihe bya Apartheid byagize ingaruka zikomeye ku birabura, ndetse agakunda no kubisabira imbabazi.

Icyakora nta na rimwe yigeze yemera ko ibikorwa byakozwe muri Apartheid ari ibyaha byibasiye inyokomuntu, nubwo yavugaga ko ari ibikorwa bitari bikwiriye kubaho.

Uku kuterura ku ngingo ya Apartheid, no kuba ku butegetsi bwe harapfuye abirabura benshi bifuzaga gutangiza impinduramatwara zirwanya Apartheid, bituma uyu mugabo afatwa na bamwe nk’umuntu w’indyarya, wakoze ibyo yakoze atabitewe n’undi mutima, ahubwo abitewe no kubura uko agira.

Icyo gihe Afurika y’Epfo yari yarafatiwe ibihano by’ubukungu byari biyimereye nabi, mu gihe Intambara y’Ubutita yari imaze kurangira, amaso y’ibihugu bikize agiye kwimukira ku biri kubera muri Afurika y’Epfo, bamwe batatinyaga kuvuga ko hatagize igikorwa bishobora kuzavamo intambara y’amoko ikomeye, ishobora no kubyara Jenoside.

Uretse ibyo kandi, mu gihe Klerk yatangiraga ibikorwa byo guhagarika Apartheid, hari hashize igihe kinini hari urwikango rw’impinduramatwara ikomeye yari igiye kuba muri icyo gihugu, na cyane ko abirabura benshi bari bamaze gukanguka, babona neza ko ibyo abazungu babakorera ku butaka bwabo ari akarengane.

Abanenga Klerk bavuga ko nta yandi mahitamo yari afite, kuko iyo arindira hakaba imyigaragambyo karundura, nk’uko ibimenyetso byabyerekanaga, yari kuvaho nabi akaba yanajyanwa mu nkiko ku byaha Leta ye yakoze, bityo gutanga ubutegetsi ku birabura mu mahoro, akabikora mu buryo bwiyubashye nawe bumwubahisha, bikaba byari kumukuraho igisebo, ariko bikanafasha Afurika y’Epfo kwirinda kugwa mu mvururu zashobora kuyisiga ahabi.

Icyakora ku rundi ruhande, abamushyigikiye bavuga ko kuba ari we muyobozi wahagurukiye iki kibazo, ndetse akanakora ibimeze nko kwiyambura ubutegetsi abuha abirabura, ari ikintu cy’ubutwari akwiriye gushimirwa.

Icyakora uruhare rwe muri Apartheid rwari rumaze iminsi rugarukwaho cyane, aho urubyiruko rwari rumaze iminsi rusaba ko akwiye kuryozwa ibyaha byakozwe na Leta ye, cyane ibijyanye n’amatsinda yashinjwaga kwica abirabura bayoboye impinduramatwara zari zirimo kuvuka muri iyo myaka.

Birazwi kandi ko nubwo uyu mugabo yagiranye imikoranire na Mandela, aba bagabo bombi bagiraga ibintu bimwe na bimwe batumvikanaho, uretse ko mu masaziro yabo bakomeje gukorana neza.

Mu itangazo Umuryango washinzwe na Klerk washyize hanze amaze amasaha macye yitabye Imana, ukavuga ko ari ubutumwa bwe bwa nyuma, rigira riti “Nta kuzuyaza, ndasaba imbabazi ku bw’akababaro k’abirabura muri Afurika y’Epfo.”

Umuryango wa Mandela wavuze ko Klerk azahora mu mateka ya Afurika y’Epfo kimwe na Nelson Mandela. Perezida wa Afurika y’Epfo, Cyril Ramaphosa, nawe yavuze ko urupfu rwa Klerk wabaye umuzungu wa nyuma wayoboye icyo gihugu, rukwiye gukoreshwa mu kwibuka urugendo rw’icyo gihugu rugana kuri demokarasi.

Klerk yasabye imbabazi ku byaha bya Apartheid byabaye muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .