00:00:00 IGIHE NETWORK KN KINYARWANDA EN ENGLISH FR FRANCAIS

FARDC yemeje ko iri mu mirwano na M23 yongeye kubura intwaro

Yanditswe na Kanamugire Emmanuel
Kuya 8 Ugushyingo 2021 saa 08:19
Yasuwe :
0 0

Igisirikare cya Repubulika Iharanira Demokarasi ya Congo cyemeje ko inyeshyamba za M23 ari zo zagabye ibitero muri Teritwari ya Rutshuru mu ijoro ryo ku Cyumweru, tariki ya 7 Ugushyingo 2021, imirwano ikaba ikomeje hagati y’impande zombi.

Amakuru y’ibitero byagabwe ku birindiro bya FARDC mu gace ka Tchanzu yaramutse avugwa mu bitangazamakuru bitandukanye byo muri Repubulika Iharanira Demokarasi ya Congo ariko hari hataremezwa neza abakiri inyuma.

Agace kagabwemo ibitero gaherereye mu bilometero birindwi uvuye ku mupaka uhuza RDC na Uganda, i Bunagana.

Amakuru yavugaga ko FARDC yakuwe mu birindiro igasubizwa inyuma ndetse ikamburwa intwaro nyinshi ndetse umupaka uhuza Uganda na RDC ugafungwa.

Itangazo FARDC yasohoye ku mugoroba wo ku wa Mbere, ryemeje ko inyeshyamba za M23 ari zo zagabye ibitero mu gace ka Tchanzu na Runyonyi uhereye saa Yine z’ijoro ku Cyumweru.

FARDC yatangaje ko nk’uko biri mu nshingano zayo zo kurinda imipaka n’ubusugire bw’igihugu, abaturage n’ibyabo, yiyemeje gukora ibishoboka igaca intege ibitero bya M23 ku butaka bwa Congo.

Iri tangazo rikomeza rivuga ko imirwano ikomeje hagamijwe kurandura Umutwe wa M23.

Abaturage barimo n’abari bavuye mu byabo berekeza muri Uganda bahumurijwe basabwa kugirira icyizere inzego z’umutekano zavuze ko zizaruhuka ari uko nta mutwe witwaje intwaro ugifite na milimetero imwe ku butaka bw’iki gihugu.

Igisirikare cyatangaje ko M23 yari imaze igihe igerageza kugaba ibitero mu bice byegeranye n’aho ibyo kuri iyi nshuro byabereye.

Muri Nyakanga 2020, M23 ngo yagabye ibitero mu gace ka Bigega, Ndiza na Bikenge hafi ya Tchanzu muri Kivu y’Amajyaruguru ariko iratsindwa.

Mu 2017 uyu mutwe wakomwe mu nkokora ubwo wari mu myiteguro yo kugaba ibitero mu gace ka Sabyinyo, Bisoke na Karisimbi muri Teritwari ya Rutshuru ndetse n’ahandi.

Igisirikare cyatangaje ko M23 yari imaze igihe igerageza kugaba ibitero mu bice byegeranye n’aho ibyo kuri iyi nshuro byabereye.

Muri Nyakanga 2020, M23 ngo yagabye ibitero mu gace ka Bigega, Ndiza na Bikenge hafi ya Tchanzu muri Kivu y’Amajyaruguru ariko iratsindwa.

Mu 2017 uyu mutwe wakomwe mu nkokora ubwo wari mu myiteguro yo kugaba ibitero mu gace ka Sabyinyo, Bisoke na Karisimbi muri Teritwari ya Rutshuru ndetse n’ahandi.

M23 yahakanye ko itigeze ijya mu ntambara

Itangazo M23 yashyize ahagaragara, yahakanye ko itigeze igaba ibitero muri Rutshuru. Rivuga ko hashize umwaka urega uyu mutwe winjiye mu biganiro na leta iyobowe na Leta iyobowe na Félix Tshisekedi.

Ibiganiro byafatiwemo imyanzuro wategereje wihanganye ko ishyirwa mu bikorwa ariko ngo Perezida Tshisekedi nta ntambwe aratera igana ku guhuza abana b’igihugu no kugarura amahoro mu Burasirazuba bwa RDC no mu gihugu muri rusange.

Rikomeza rigira riti "M23 ntiyigeze igaba ibitero muri Teritwari ya Rutshuru."

M23 yavuze ko abasirikare bayo bari muri Teritwari ya Rutshuru aho bategerereje ko Leta ishyira mu bikorwa imyanzuro ku bibazo byakuruye amakimbirane yatumye yinjira mu ntambara bashotorwa na bamwe mu Ngabo za FARDC kuva mu 2020.

Kuva icyo gihe ngo bagiye bifata bakanga kongera kwinjira mu mirwano idakwiye.

Nubwo bimeze bityo ngo ntibazihanganira umutwe uwo ari wo wose uteza umutekano muke hafi y’aho izo ngabo zashyizwe kuko ibyo zangije bigerekwa ku mutwe wabo [M23].

Perezida wa M23 washyize umukono kuri iri tangazo yagize ati "Dufitiye icyizere Umukuru w’Igihugu ko azashyira mu bikorwa ibyemerejwe mu biganiro hagamijwe kugarura amahoro mu gihugu."

Intumwa za RDC n’iza M23 zahuriye i Kigali muri Nyakanga 2019 zemeranya ku bintu birimo ko abahoze ari abarwanyi ba M23 bakurirwaho impapuro zisaba itabwa muri yombi ryabo no kuba bashyirwa mu nzego za politiki no mu gisirikare cya RDC.

Ayo masezerano yagombaga gushyirwa mu bikorwa mu gihe cyihuse. Ku wa 28 Ukwakira, intumwa za RDC n’iz’abahoze ari abarwanyi ba M23 bongeye guhurira i Kigali, basinya inyandiko ihuriweho igaragaza uburyo amasezerano ya mbere azagenda ashyirwa mu bikorwa mu byiciro.

Mu mahame harimo ko mu mezi abiri gusa amasezerano azaba yamaze gushyirwa mu bikorwa, bivuze ko mu Ukuboza 2019 ikibazo cy’aba barwanyi cyagombaga kuba cyararangiye burundu.

Inkomoko ya M23

Izina rya M23 (Mouvement du 23 Mars) rifite inkomoko ku wa 23 Werurwe 2009, ubwo Leta ya Congo yasinyaga amasezerano y’Amahoro na CNDP (Congrès National pour la Defence du Peuple) yayoborwaga na Gen Laurent Nkunda (yaje gusimburwa na Gen. Bosco Ntaganda).

Igice cy’abaturage Nkunda yarwaniraga bamwe mu Banye-Congo ntibabemera nk’abenegihugu bagenzi babo ku buryo babahigaga bukware bakicwa nk’inyamaswa, maze hagiyeho umutwe ubarengera bose barawuyoboka.

Aba ni bo bari batuye mu Burasirazuba bwa Repubilika Iharanira Demokarasi ya Congo mu gice cyahoze ari icy’u Rwanda ari na yo ntandaro yo kuba benshi mu bari muri M23 bavuga ikinyarwanda ku buryo wakeka ko ari Abanyarwanda.

Amasezerano yo kuwa 23 Werurwe yagenaga ko abari muri uwo mutwe bashyirwa mu ngabo za leta abandi bagasezererwa bagasubizwa mu buzima busanzwe, ugahinduka ishyaka rya politiki n’abari abarwanyi bawo bafunzwe bakarekurwa.

Gusa kuwa 4 Mata 2012, havutse undi mutwe wavugaga ko ya masezerano atashyizwe mu bikorwa, abari binjijwe mu ngabo za leta batangira kuziyomoraho.

M23 icyo gihe yahise itangirana n’abasirikare bagera kuri 300 bahoze muri CNDP bigumuraga bavuga ko bafashwe nabi mu ngabo za leta, badahembwa, igisirikare nta bushobozi gifite ndetse ko bicwa n’inzara.

Igisirikare cya Leta ya Repubulika Iharanira Demokarasi ya Congo (FARDC) cyemeje ko kiri mu mirwano na M23 yongeye kubura intwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .