Ethiopia: Minisitiri w’Intebe yashyizeho guverinoma nshya irimo abagore 50%

Yanditswe na Mathias Hitimana
Kuya 16 Ukwakira 2018 saa 09:39
Yasuwe :
0 0

Bwa mbere Ethiopia yagize muri Guverinoma umubare w’abagore ungana n’uw’abagabo.

Kuri uyu wa Kabiri, Minisitiri w’intebe wa Ethiopia, Dr Abiy Ahmed, yatangaje Guverinoma y’abaminisitiri 20 irimo abagore 10 barimo umwe wahawe kuyobora Minisiteri y’Ingabo.

Aisha Mohammed ni we ubaye umugore wa mbere muri Ethiopia kuyobora Minisiteri y’Ingabo.

Nk’uko BBC yabitangaje, Abiy yasobanuye ko bimwe mu byatumye aha imyanya abagore ari uko “ari bo batarya ruswa cyane ugereranyije n’abagabo”.

Yanavuze ko icyo cyemezo kizagarura amahoro n’umutekano.

Abiy yanagabanuye abagize Guverinoma bava kuri 28, baba 20, harimo Minisiteri nshya ishinzwe amahoro izayoborwa na Muferiat Kamil, wahoze ari Perezida w’Inteko Ishinga Amategeko.

Kuva Dr Abiy yaba Minisitiri w’Intebe wa Ethiopia mu mezi arindwi ashize, amaze gukora impinduka nyinshi zirimo n’amasezerano yasinywe hagati y’iki gihugu na Eritrea, yabyukije umubano nyuma y’imyaka 20 bihanganye.

Yahaye imbabazi imfungwa za politiki ibihumbi. Ku birebana no guha imyanya abagore ingana n’iy’abagabo muri Guverinoma, Ethiopia iteye ikirenge mu cya Canada.

Mu Ugushyingo 2015, ni bwo Minisitri w’Intebe wa Canada, Justin Trudeau, yashyizeho Guverinoma ifite abagore bangana n’abagabo (15 kuri 15). Na Perezida w’u Bufaransa, Emmanuel Macron yabikoze atyo mu 2017.

Ihuriro ry’amashyaka ari ku butegetsi muri Ethiopia (EPRDF) muri Mata 2018, ni bwo ryagize Dr Abiy Minisitiri w’Intebe.

Uyu mugabo w’imyaka 42 y’amavuko, ari we wa mbere ukomoka mu bwoko bw’aba-Oromo wayoboye ihuriro ry’amashyaka ane ari ku butegetsi (EPRDF)’ mu myaka 27 ishize.

Ubu bwoko bugize umubare munini (1/3) cy’abaturage ba Ethiopia ariko bamaze igihe bayoborwa n’ubwa aba -Amhara n’ubwa Tigre. Yagiye ku butegetsi nyuma yo kwegura kwa Desalegn Hailemariam.

Minisitiri w’Intebe wa Ethiopia, Dr Abiy Ahmed, yashyize muri Guverinoma abagore bangana n'abagabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza