Ethiopia: Guverinoma yatangaje ko igihugu cyinjiye mu bihe bidasanzwe nyuma y’iyegura rya Minisitiri w’Intebe

Yanditswe na Cyprien Niyomwungeri
Kuya 17 Gashyantare 2018 saa 10:21
Yasuwe :
1 0

Guverinoma ya Ethiopia yatangaje ko igihugu kiri mu bihe bidasanzwe nyuma y’uko mu buryo butunguranye uwari Minisitiri w’Intebe w’iki gihugu, Hailemariam Desalegn, atangaje ko yeguye ku butegetsi.

Ku wa Kane w’iki cyumweru Hailemariam yatangaje ko yeguye nyuma y’ibibazo bishingiye kuri politiki byibasiye Ethiopia.

Itangazo ryanyuze kuri Televiziyo y’igihugu, EBC, kuwa Gatanu risobanura ko icyemezo cyo kwinjira mu bihe bidasanzwe kigamije guhosha imyigaragambyo y’abatavuga rumwe n’ubutegetsi.

Ntihatangajwe byinshi ku bijyanye n’iminsi igihe kidasanzwe kizamara cyangwa ibitemewe gukorwa muri iki gihe.

Guverinoma ya Ethiopia imaze igihe ku gitutu cy’imyigaragambyo y’abatavuga rumwe n’ubutegetsi, cyatumye ifata icyemezo cyo kurekura imfungwa zirimo n’abanyapolitiki bayirwanya. Ariko ibi ntibyahagaritse imyigaragambyo yatangiye mu 2015 mu moko y’abaturage ba Amhara na Oromia, biyumva ko basigajwe inyuma kuva mu 1991 ubwo ishyaka rya EPRDF ryajyaga ku butegetsi. Aba bagize 61% by’abatuye Ethiopia.

Muri Kanama 2017, Ethiopia yahagaritse ibihe bidasanzwe by’amezi 10 yari yashyizeho nyuma y’uko amagana y’abaturage baguye mu myigaragambyo y’abatavuga rumwe n’ubutegetsi, abandi bagatabwa muri yombi bashaka ubwisanzure muri politiki.

Muri ibyo bihe bidasanzwe, serivisi za internet kuri telefoni ndetse n’imbuga nkoranyambaga byarahagaritswe, nk’imwe mu ngamba Leta yafashe.

Kuva icyo gihe kandi byatangajwe ko Abadipolomate b’abanyamahanga baba muri iki gihugu batemerewe kurenga mu birometero 40 uvuye i Addis Ababa badafite uruhushya rw’ubutegesti, hahagarikwa kandi ibikorwa by’amashyaka atavuga rumwe n’ubutegetsi n’ibindi.

Gusa Leta yaje gukuraho ibyemezo byari byafatiwe abo badipolomate, ibemerera kugenda uko bashaka.

Imyigaragambyo y'abatavuga rumwe n'ubutegetsi muri Ethiopia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza