00:00:00 IGIHE NETWORK KN KINYARWANDA EN ENGLISH FR FRANCAIS

Ethiopia: Abiy Ahmed yatsindiye indi manda mu matora yabaye mu mvururu

Yanditswe na Bukuru JC
Kuya 11 Nyakanga 2021 saa 02:12
Yasuwe :
0 0

Ishyaka ry’Uburumbuke, Prosperity Party (PP) rya Minisitiri w’Intebe wa Ethiopia, Dr Abiy Ahmed, ni ryo ryaje imbere mu matora rusange aherutse, bikaba byamuhaye amahirwe yo gukomeza kuyobora icyo gihugu mu yindi manda.

CNN yatangaje ko ishyaka rya Abiy ryegukanye imyanya 410 muri 546 igize Inteko Ishinga Amategeko.

Abiy w’imyaka 44 yagiye ku butegetsi muri Mata 2018 nyuma y’iyegura rya Hailemariam Desalegn. Abiy ni we wa mbere wo mu bwoko bw’Aba-Oromo bufatwa nka nyamwinshi mu gihugu wari ugiye kuri uwo mwanya nyuma y’igihe hayobora ba nyamuke bo muri Tigray.

Akigera ku butegetsi yazanye impinduka zirimo no guhindura amahuriro y’amashyaka arimo na TPLF yo muri Tigray ari nayo yisunze ngo ajye ku butegetsi, ashinga ishyaka rye rishya PP ririmo n’andi mashyaka yahoze muri TPLF.

Benshi mu bari ibikomerezwa bakekwaho ruswa bo muri Tigray, intara yo mu Majyaruguru barafunzwe abandi barirukanwa, birakaza abo muri iyo ntara bari bamaze imyaka isaga 30 ku butegetsi.

Kubera gukomeza kwimura amatora kubera Covid-19, abo muri Tigray barabyamaganye bashaka gutegura amatora yabo, Leta ibima ingengo y’imari inagaragaza ishyaka TPLF nk’iritemewe.

Mu Ugushyingo 2020 muri Tigray hadutse imirwano imaze guhitana ubuzima bwa benshi. Yatangiye ubwo abarwanyi b’iryo shyaka bashinjwaga na Leta gutera ibigo bya gisirikare bagamije kwiba intwaro.

Imirwano n’ubu iracyakomeje ndetse imiryango irengera uburenganzira bwa muntu igaragaza ko muri Tigray hari gukorerwa ibyaha byibasiye inyokomuntu.

Amwe mu mashyaka atavuga rumwe na Leta yatangiye kugira impungenge ku buziranenge bw’ibyavuye mu matora ishyaka rya Abiy ryatsinze, kuko bavuga ko yaranzwe n’ubugizi bwa nabi, gufunga abatavuga rumwe na Leta n’ibindi.

Ishyaka PP ni ryo riza imbere mu majwi, mu mashyaka 47 yari yiyamamaje. Abanya-Ethiopia basaga miliyoni 37 ni bo bari biyandikishije nk’abazatora icyakora benshi ntibatoye kubera ibibazo by’umutekano ku buryo bategereje kuzongera gutora mu cyiciro cya kabiri cy’amatora kizaba muri Nzeri uyu mwaka mu duce turi mu mvururu.

Dr Abiy yatsindiye manda ya kabiri yo kuyobora Ethiopia nyuma y'uko ishyaka rye rije imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .