Kwamamaza

Ethiopia: Abasaga 50 baguye mu myigaragambyo

Yanditswe kuya 3-10-2016 saa 08:23' na Niyonsenga Schadrack


Abantu 52 baguye mu mvururu zadutse hagati y’abashinzwe umutekano n’abaturage bo mu gace ka Oromia muri Ethiopia kuri iki Cyumweru.

Uretse abaguye muri iyi myigaragambyo, ngo abantu batari bake bayikomerekeyemo.

Abapfuye bazize umubyigano wabayeho nyuma y’uko polisi ibasutsemo imyuka iryana mu maso, gukubitwa inkoni ndetse n’amasasu yabarasagaho.

Minisitiri w’Intebe wa Ethiopia, Hailemariam Desalegn, yatangaje ko iyi nsanganya yatewe n’akavuyo kakuruwe n’aba baturage. Gusa yahakanye yivuye inyuma iby’uko polisi yaba yakoresheje amasasu mu gutatanya aba baturage nkuko byavugwaga.

Mu itangazo ryatambutse kuri Televiziyo y’Igihugu, Minisitiri w’Intebe Desalegn yashimye ingufu zashyizwe mu kurinda abaturage ariko anagaya abagize uruhare mu rupfu rw’aba bantu, yizeza abanyagihugu ko ababigizemo uruhare bagomba gushyikirizwa ubutabera.

BBC itangaza ko abantu ibihumbi bari bateranye aho bari bitabiriye ibirori by’idini (bitasobanuwe) mu gace ka Bishoftu, gaherereye mu bilometero 40 uvuye mu Murwa Mukuru Addis Ababa.

Amakuru aturuka muri iki gihugu avuga ko polisi yarashe imyuka kuri aba baturage mu rwego rwo kwirwanaho nyuma y’uko abigaragambayaga bari bari kuyitera amabuye n’amacupa, gusa hari abandi bavuga ko aba baturage bagendaga mu mahoro.

Umwe mu bo mu bwoko bwa Oromo witwa Jawar Mohamed, yatangaje ko abantu 300 bishwe naho abandi benshi bagakomereka, aho yavuze ko ingabo ndetse n’indege z’intambara zarashe urufaya ku bantu kugeza aho hari n’abaguye mu kiyaga bahunga.

Muri iki gihugu hamaze iminsi hagaragara ubwicanyi cyane ububa mu gihe cy’imyigaragambyo, aho abigaragambya baba bahanganye n’inzego z’umutekano.

Akenshi iyi myigaragambyo ikorwa n’abaturage bo mu duce twa Oromia na Amhara, binubira ihezwa bakorerwa mu buryo bwa politiki ndetse n’ubw’ubukungu.

Leta Zunze Ubumwe za Amerika ziherutse gutangaza ko muri Ethiopia hari icyo bise ikoreshwa ry’ingufu zidasanzwe ku bigaragambya.

Ibiro Ntaramakuru by’Abanyamerika (AP) byanditse ko abantu babarirwa muri miliyoni ebyiri bari bitabiriye ibirori byabaye kuri iki cyumweru baririmbaga indirimbo zigira ziti “Turashaka ubwigenge” “turashaka ubutabera.”

Benshi mu bari bagiye muri iyi myigaragambyo ngo bari biteze udutambaro mu mutwe, ikimaze kuba ikimenyetso ku bigaragambya b’aba Oromo.

Ibibazo by’imvururu za buri gihe muri iki gihugu by’umwihariko ku baturage bo mu bwoko bwa Oromo, zadutse mu Ugushyingo umwaka ushize, aho abaturage binubiraga umugambi wa Leta y’iki gihugu wo kwagura umurwa mukuru bikagera no mu gace ka Oromia gatuyemo aba baturage, byateye ubwoba aborozi baho batekereza ko bazimurwa.

Uyu mugambi waje guhagarara ariko aba baturage bo bakomeza kwigaragambya bamagana ihezwa rikabije bakorerwa ndetse no kwamburwa uburenganzira bwa muntu.

Imyigaragambyo nk’iyi yakozwe n’aba baturage yari yabaye muri Kanama uyu mwaka aho abaturage basaga 100 bari bayisizemo ubuzima, abatari bake barahakomerekera.

Abantu batari bake bari mu myigaragambyo batatanyijwe na polisi 52 bahasiga ubuzima

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved