Kwamamaza

Ethiopia: Abagororwa 23 bapfuye bazize umuriro wadutse muri gereza

Yanditswe kuya 6-09-2016 saa 07:36' na Ezechiel Mbananabo


Abagororwa 23 bari bafungiye muri gereza ya Qilinto muri Ethiopia bapfuye bazize umuriro wayadutsemo ku wa Gatandatu w’icyumweru gishize.

Iyi gereza isanzwe ifungiyemo abatavuga rumwe na Leta bo mu bwoko bw’aba Oromo bafashwe bari mu myigaragambyo.

Guverinoma y’iki gihugu yasohoye itangazo rivuga ko 21 muri bo bazize kubura umwuka kubera umubyigano mu gihe abandi babiri bishwe ubwo bageragezaga gutoroka.

Bimwe mu bitangazamakuru by’imbere mu gihugu byagaragaje ugushidikanya kuri iyo mibare, bivuga ko abatangabuhamya batatangajwe amazina bagaragaje ko aba bagororwa bishwe barashwe n’abarinda gereza nk’uko BBC yabitangaje.

Bavuze ko humvikanaga urusaku rw’amasasu muri gereza ya Qilinto iherereye mu nkengero z’umurwa mukuru Addis Ababa nyuma y’aho umuriro uyibasiriye.

Amafoto yashyizwe ku mbuga nkoranyambanga ku wa Gatandatu yerekana ibisa n’umwotsi uva muri iyi gereza.

Hari amakuru kandi avuga ko uwo muriro waba warakijwe n’abashakaga gutoroka ariko nta gihamya yemeza ibi.

Minisitiri w’Intebe wa Ethiopia, Hailemarim Desalegn yamaganye ababa bakoze icyo gikorwa, aho yavuze ko bari mu mutwe w’abarwanya amahoro bashatse guteza akajagari. Kugeza ubu, imyirondoro y’abapfuye ntirashyirwa ahagaragara.

Imyigaragambyo yadutse mu Ugushingo umwaka ushize muri Ethiopia nyuma y’umugambi wari watangajwe wo kwagurira umurwa mukuru Addis Ababa mu gace ka Oromia. Ibi byatumye abahinzi bo mu bwoko bwa Oromo (abaturage benshi babarizwamo) muri ako gace bagira impungenge n’ubwoba bwo kwimurwa.

Nubwo uwo mugambi waje guhagarikwa, ntibyabujije imyigaragambyo gukomeza kubera ibibazo abayikora bagaragaza birimo guhezwa no kutubahiriza uburenganzira bwa muntu.

Umuryango uharanira uburenganzira bwa muntu, Human Rights Watch, ugaragaza ko abantu 400 bishwe bahangana n’inzego z’umutekano kuva imyigaragambyo itangiye, ariko Guverinoma ntiyemera iyo mibare.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved