Kwamamaza

Ese igihembo cya Mo Ibrahim ni indorerwamo nyakuri y’imiyoborere muri Afurika?

Yanditswe kuya 25-10-2016 saa 15:17' na Tuyisenge Jean Pierre


Imyaka itanu irihiritse igihembo cyitiriwe Mo Ibrahim gihabwa abahoze ari abayobozi ba leta na za Guverinoma muri Afurika, bavuye ku butegetsi, kandi bakaba baratowe mu buryo bwa demokarasi bakubahiriza manda zigenwa n’Itegeko Nshinga, kibuze ugihabwa.

Ni ibintu bishobora guhita byumvikana mu matwi ya bamwe nk’igisobanuro nyacyo cy’imiyoborere mibi iranga abategetsi b’Umugabane wa Afurika kuva batangiye kugeza barangije igihe cyabo ku butegetsi.

Kuva iki gihembo cyatangira gutangwa mu 2006, kimaze guhabwa abaperezida bane gusa barimo Hifikepunye Pohamba wayoboye Namibia (2014), Perezida Pedro Pires wa Cap Verde (2011), Perezida Festus Mogae wa Botswana (2008), na Perezida Joaquim Chissano wa Mozambique (2007).

Ibi bivuze ko imyaka ya 2009, 2010, 2012, 2013 na 2015 kitigeze gitangwa bitewe no kubura ugikwiriye nkuko byatangajwe na Komite ishinzwe gutegura Mo Ibrahim.

Ku wa 3 Ukwakira 2016, uyu Muryango wasohoye icyegeranyo uvuga ko Afurika yazamutse mu miyoborere mu myaka 10 ishize.
Muri rusange ikaba yariyongereyeho inota rimwe muri icyo cyiciro mu myaka 10 ishize.

Mu kugena uhabwa iki gihembo hashingirwa ku miyoborere n’uruhare Umukuru w’Igihugu agira mu guteza imbere abaturage. Dutanze urugero k’u Rwanda, mu cyegeranyo uherutse gusohora muri uyu mwaka wa 2016, uyu Muryango warushyize ku mwanya wa 9 mu bihugu 54 mu bijyanye n’imiyoborere, aho rufite amanota 62.3%.

Ruza kandi imbere muri Afurika mu bijyanye no guteza imbere icyaro. Ni urwa mbere mu guteza imbere uburinganire bw’ibitsina byombi n’amanota 90.3%, ni ukuvuga ko rwazamutseho amanota 24.6 mu myaka 10 ishize.

Si rwo gusa kuko icyo cyegeranyo kigaragaza ibihugu byose muri rusange ariko umugabane wose ugaragazwa nk’uwagize iterambere mu miyoborere nubwo nta mukuru w’Igihugu wabihembewe.

Abagihawe bitwaye bate bakiri ku butegetsi?

Ikigaragara ni uko abakuru b’Ibihugu babashije guhabwa ibihembo hashingiwe ku mirongo migari y’indashyikirwa mu miyoborere baba baragaragaje kakiri ku butegetsi.

Ubwo iki gihembo cyahabwaga Uwari Perezida wa Namibia Hifikepunye Pohamba mu mwaka wa 2014, Salim Ahmed Salim uhagarariye Komite ishinzwe kugena abahabwa iki gikombe yabwiye The Washington Post ko uyu mukuru w’Igihugu yagaragaje imiyoborere myiza mu gihe yamaze ku butegetsi.

Raporo ya Mo Ibrahim ya 2013, igaragaza ko Pohamba yagize uruhare mu kwimaza Demokarasi n’iterambere mu gihugu cye. Ivuga ko yimakaje uburinganire ku buryo 48% mu Nteko Ishinga Amategeko bari abagore ku ngoma ye.

Yashimiwe kandi kuba ku buyobozi bwe, abana bagana ishuri bariyongereye ku buryo bageze ku 100%, bitewe no gukuraho amafaranga y’ishuri.

Pohamba kandi yashimiwe kubungabunga ubuzima bw’abantu kuko 80% by’abantu babanaga n’ubwandu bwa Virusi ya Sida bahawe imiti igabanya ubukana, ndetse ubwandu bushya bugabanuka kugera kuri 36% hagati ya 2005 na 2013, na ho ababyeyi banduza abana bababyara bagabanuka kugera kuri 4%.

Abatagihabwa biba byagenze bite?

Itangazo ry’uko nta Mukuru w’Igihugu watsindiye igihembo cya Mo Ibrahim mu mwaka wa 2015, ryasonanuraga ko Perezida Jakaya Mrisho Kikwete wayoboraga Tanzania, Armando Guebuza wa Mozambique na Goodluck Jonathan wa Nigeria baherukaga kuva ku butegetsi, batigeze bagaragaza ibikwiriye gushingirwaho bahabwa icyo gikombe.

Ibitangazwa muri Raporo za Mo Ibrahim, ni ikiganiro mpaka gishobora kumara igihe kitari gito kuko hari abasesenguzi banenze imikorere y’Itsinda ry’Uyu muryango rikunze gukora ibyegeranyo ku miyoborere ya Afurika ndetse bakavuga ko hari igihe batanyurwa n’ibyatangajwe muri icyo cyegeranyo.

Dr Mohammed Ibrahim,ni umunya-Sudani w’umumiliyoneri, uzwi cyane mu gucuruza telefoni akagira na Sosiyete y’Itumanaho ya Celtel.

Yashinze Umuryango yise Mo Ibrahim Foundation mu mwaka wa 2006, agamije guhemba abakuru b’ibihugu bagaragaje imiyoborere myiza bakiri abayobozi.

Dr Mohammed Ibrahim washinze umuryango wamwitiriwe, utanga ibihembo ku bayobozi ba Afurika bimakaje imiyoborere myiza
Dr Hifikepunye Pohamba wigeze kuyobora Namibia akaza no kwegukana igihembo cya Mo Ibrahim

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved