EAC yahakanye ko hari abakozi bayo bataye akazi kubera kudahembwa

Yanditswe na Bukuru JC
Kuya 13 Kanama 2019 saa 09:21
Yasuwe :
0 0

Ubunyamabanga bw’Umuryango wa Afurika y’Iburasirazuba, EAC, bwahakanye ko hari abakozi bawo basubiye mu bihugu bakomokamo kubera kubura imisharara, nk’uko byavuzwe mu itangazamakuru.

Ikinyamakuru The East African mu nimero yo ku wa 10-16 Kanama cyari gifite umutwe uvuga ko “abakozi ba EAC bavuye mu mirimo yabo kubera kubura imishahara", ibintu EAC ivuga ko nta shingiro bifite.

Mu itangazo yashyize ahagaragara kuri uyu wa Kabiri, Umunyamabanga Mukuru Wungirije wa EAC ushinzwe Igenamigambi n’ibikorwa remezo, Eng. Steven Mlote, yavuze ko nta mukozi w’inzego za EAC wataye akazi, ndetse bose aho bava bakagera bahembwe umushahara wa Nyakanga 2019.

Yakomeje avuga ko ku kijyanye n’abakozi bashobora kuba batari aho bakorera, nk’uko biteganywa n’ingingo ya 71 y’amasezerano ashyiraho EAC, porogaramu n’imishinga bya EAC bihurizwa mu bunyamabanga bwa EAC n’abakozi bakorera mu bihugu binyamuryango.

Ati “Abacamanza b’urukiko rwa Afurika y’Iburasirazuba n’abagize Inteko Ishinga amategeko y’umuryango, baza i Arusha iyo hari gahunda bagomba kuhakora hakurikijwe ingengabihe yemejwe. Abakozi bari aho badakorera bashobora kuba bari mu kiruhuko cy’umwaka cyangwa mu butumwa mu bihugu bigize umuryango."

"Mu bakozi 400 mu nzego eshatu za EAC zikorera Arusha, 14 bari mu kiruhuko cy’umwaka, umwe ari mu kiruhuko cy’ababyeyi mu gihe 11 bari mu butumwa mu bihugu bigize umuryango. Bityo ntabwo ari ukuri ko hari abakozi basubiye iwabo kubera kudahembwa. Bitandukanye n’ibyatangajwe na The East African, umuryango urimo gukora nk’uko bisanzwe, abakozi n’inzego zose bari mu mirimo.”

Ku kibazo cy’imisanzu y’ibihugu itinda, Eng. Mlote yavuze ko ibihugu bitangira gutanga imisanzu yabyo guhera muri Kanama buri mwaka w’ingengo y’imari, iki gikorwa kigafata nibura amezi atatu.

Gusa ngo hari ubwo bitinda ahanini bitewe n’uko amafaranga abanza kugenda yemezwa muri buri gihugu, kandi hari icyizere ko azakomeza gutangwa kandi neza.

Eng Mlote yagaragaje ko umuryango ukomeje gukora inshingano zawo kandi ugera no ku ntego wihaye.

Icyicaro cy'Umuryango wa Afurika y'Iburasirazuba i Arusha muri Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza