EAC yagiriwe inama yo gushyiraho impamyabumenyi zihuriweho

Yanditswe na Evariste Nsengimana
Kuya 30 Nzeri 2018 saa 09:34
Yasuwe :
0 0

Umuyobozi Mukuru w’ishami ry’uburezi mu muryango w’Afurika y’Iburasirazuba (EAC), Dr. James Otieno, yagiriye inama ibihugu biwugize yo gushyiraho impamyabumenyi bihuriyeho, hagamijwe koroshya urujya n’uruza rw’abashaka akazi.

U Rwanda, Uganda, Tanzania, Kenya, u Burundi na Sudani y’Epfo bigize EAC, bituwe n’abaturage basaga miliyoni 150. Bishyize imbere gukabya inzozi zo gushyiraho amasezerano yorohereza ababituye no gufasha abanyamwuga gukora mu gihugu bifuza nta nzitizi.

Ibi bihugu kandi byiyemeje kuvanaho inzitizi mubucuruzi, koroshya urujya n’uruza rw’abantu, ibintu, abakozi, serivisi n’ishoramari.

Mu kiganiro yahaye abanyamakuru i Arusha muri Tanzania cyibanze ku byo EAC yagezeho n’imbogamizi yagize, Dr. Otieno yasabye ko ibihugu byakuraho ibintu zose zishobora kubangamira abanyamwuga.

Yatanze urugero aho usanga hari impamyabumenyi zitangwa n’ibigo bimwe byo muri EAC byemewe ariko ugasanga nta gaciro bihabwa.

Yavuze ko kugira ngo EAC ishyire mu bikorwa amasezerano yorohereza abanyamwuga muri aka karere, ibigo bitanga ibizamini bikwiye kwemera impamyabumenyi zitangirwa mu bihugu binyamuryango, n’abashaka akazi ntibagire ikibakumira.

Ngo byagabanya amanyanga mu banyamwuga binjira ku soko anatuma bakora akazi nabi kubera ko nta bushobozi n’ubumenyi buhambaye bafite.

Dr Otieno yavuze ko bibabaje kubona hari ibihugu bimwe bya EAC bitarashyira umukono kuri ayo masezerano yorohereza abanyamwuga, kuko bibuza abakozi gusaba akazi no gukorera aho bifuza nkuko New Vison yabitangaje.

Ayo masezerano azwi nka MRA asaba ibihugu kwemera impamyabumenyi zatanzwe n’ibigo bigenzura abanyamwuga gukora akazi batongeye gukora ikindi kizamini.

Ingingo ya 102 na 103 mu masezerano ya EAC, iteganya ko ibihugu binyamuryango bigomba gukorera hamwe mu burezi, bigahana abakozi kandi bigafatanya mu guteza imbere ubumenyi n’ikoranabuhanga.

Iya 11 yo iteganya uburyo bwo kwemera impamyabumenyi z’abanyamyuga mu rwego rwo korohereza abakozi gushaka akazi na serivisi.

Inateganya ko ibihugu bigize EAC byemera impamyabumenyi, ubumenyi, ibyemezo n’ibindi byangombwa bitangwa na kimwe muri byo bihugu.

Inateganya ko bishyiraho integenyanyigisho, ikizamini, amahame, ibyemezo biha uburenganzira amashuri n’ibigo bihugura, ku buryo abanyeshuri n’abarimu bakorera cyangwa bakiga aho bashaka.

Kuva 2011 hasinywe amasezerano ane yemerera abanyamyuga gukorera aho bashaka, arimo ay’abize icungamutungo, ubugeni, ubwubatsi n’ubuvuzi bw’amatungo.

Uganda, Kenya n’u Rwanda byayashyizeho umukono yose ariko Tanzania ntirasinya ay’abanyabugeni n’ubuvuzi bw’amatungo mu gihe u Burundi butarasinya ay’ubwubatsi n’ubuvuzi bw’amatungo.

EAC ifite intego ko hazanasinywa ay’abize kubarura ubutaka n’ay’abahanga mu by’imiti.

Umuyobozi Mukuru w’ ishami ry’uburezi mu Muryango wa Afurika y’Iburasirazuba(EAC), Dr. James Otieno

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza