Kwamamaza

EAC mu ihurizo nyuma y’ibura ry’imisanzu y’ibihugu n’abaterankunga bakavanamo akabo karenge

Yanditswe kuya 4-09-2016 saa 11:48' na Rabbi Malo Umucunguzi


Ubunyamabanga bw’Umuryango wa Afurika y’u Burasirazuba, EAC, bugaragaza impungenge ku ishyirwa mu bikorwa ry’imishinga itandukanye, biturutse ahanini ku bihugu bidatanga imisanzu ku gihe, ndetse n’abaterankunga bakaba batarishimiye uburyo uyu muryango ukoresha amafaranga.

Umunyamabanga Mukuru w’Umuryango wa Afurika y’u Burasirazuba, Libérat Mfumukeko, mu kiganiro na The East African yagarutse kuri nyinshi mu ngingo z’ingenzi zireba ubuzima bw’Umuryango wa Afurika y’u Burasirazuba.

Hari imishinga ihanzwe amaso

Mfumukeko avuga ko mu myaka itanu iri imbere nk’Umunyamabanga Mukuru wa EAC, mu byo yiteze harimo guteza imbere urujya n’uruza rw’abantu n’ibicuruzwa, imwe mu ntego zikomeye za EAC.

Ati “Nizera ko mu myaka itanu, Ubunyamabanga buzabasha kwereka abatuye Afurika y’u Burasirazuba ibyo twabakoreye; ibihugu by’akarere bikihuza n’abacuruzi mpuzamahanga mu gushaka amasoko hanze no kuzana abashoramari benshi muri Afurika y’u Burasirazuba. Niteze n’iterambere mu bijyanye n’ikoranabuhanga.’’

“Ihuzwa rya gasutamo na ryo ni ingenzi kuri twe. Muri make twizera ko mu 2017, ibicuruzwa byose mu karere bizajya binyuzwa muri gasutamo inshuro imwe gusa, ku cyambu byinjiriyeho. Nizera ko tuzaba tunafite urujya ‘uruza rw’abantu kuko ntiwavuga isoko rusange abantu batisanzuye mu ngendo.”

Amb. Mfumukeko yavuze ko inganda zo mu karere zigomba gutezwa imbere, ku buryo hagabanywa gutumizwa hanze ibikoresho byinshi ahubwo inganda zihari zigomba guhaza isoko mu buryo bushoboka.

Ati “Mu nama y’abakuru b’ibihugu iheruka, twagaragaje inganda zikora imyenda n’iziteranya imodoka, nk’inzego ebyiri akarere kagomba kwitaho by’umwihariko. Ubu twatangiye gushakisha abafatanyabikorwa mu bijyanye n’ubudozi. Turi gushaka abashoramari n’inzego zadufasha guteza imbere ibjyanye no gukora imyenda.”

Ibibazo by’ingutu bishobora kuzitira urwo rugendo

Ambasaderi Mfumukeko avuga ko nubwo hari ubushake bwoguhindura ibintu mu karere, hari n’ikibazo cy’amikoro kitoroshye.

Ati “ Ubu hari ibibazo bibiri. Kimwe ni ubushobozi bw’ibihugu bigize uyu muryango mu gutanga imisanzu ku gihe. Baba bagomba kurangiza gutanga imisanzu yabo bitarenze Ukuboza muri buri mwaka w’ingengo y’imari [utangira muri Kamena]. Gusa nta gihugu na kimwe kirabasha kubikora. Muri uyu mwaka w’ingengo y’imari tumaze kwakira miliyoni $2.4 muri miliyoni $50 dutegereje ku bihugu bigize uyu muryango.’’

“Ibi ni ukuvuga ko hari imishinga myinshi tutabasha gushyirwa mu bikorwa. Ariko imwe mu mishinga nk’uwo guhuza ifaranga uterwa inkunga na Banki y’Isi yo nta kibazo ifite. Banki Nyafurika Itsura Amajyambere na yo iri kwita ku bakozi bo mu mishinga itera inkunga. Ku bandi bakozi basigaye, dushyira imbere kubabonera imishahara.’’

Iby’abaterankunga bihagaze bite?

Mfumukeko yavuze ko hari ikibazo mu kubona ubushobozi buzatuma ibikorwa by’uyu muryango bishoboka, aho amasezerano y’abaterankunga na yo yarangiye.

Ati “Imbogamizi hano yari uko amenshi mu masezerano y’imyaka itatu yashyizweho umukono mu 2012 yarangiye umwaka ushize. Twakiriye gusa 30 ku ijana by’inkunga twari dutegereje mu bafatanyabikorwa mu iterambere.’’

“Twagize inama n’abafatanyabikorwa bacu batubwira ko batishimira uburyo twakoze mu Bunyamabanga. Batubwiye ko dukoresha amafaranga menshi ku ngendo n’inama. Banadusabye gushyiraho urwego rukurikirana imishinga, ku buryo rwajya rubamenyesha aho imishinga batera inkunga igeze.’’

Ikindi Mfumukeko yagaragaje ni uko abafatanyabikorwa ba EAC batigeze bishimira uburyo ibyo abakozi ba EAC bagenerwa buri munsi, byari hejuru cyane y’ibyo abakozi bahagarariye abaterankunga mu mishinga bagenerwaga.

EAC irashaka kwishakamo ubushobozi

Amb. Mfumukeko yavuze ko hatekerejwe uburyo bwo kunganira ikusanywa ry’ingengo y’imari ikenewe ngo EAC ibashe kugera ku nshingano zayo.

Ati “Igitekerezo cyabaye gukura amafaranga make ku misoro y’ibicuruzwa bitumizwa hanze ya EAC agashyirwa mu Bunyamabanga. Iki gitekerezo bizasaba ko kibanza cyemezwa n’Inama y’Abaminisitiri b’Imari bo mu bihugu bigize uyu muryango.’’

Mfumukeko avuga uyu uzaba ari undi musoro ukenewe kuko uzifashishwa mu mishinga izahindura ubuzima bw’abatuye EAC.

Muri iki cyumweru, Mfumukeko watangiye kuyobora Ubunyamabanga bwa EAC yabwiye Abadepite b’Inteko Ishinga amategeko y’uyu muryango ko yatangiye amavugurura azatuma nibura hazigamwa miliyoni $6.

Mu gushyira mu bikorwa izo mpinduka harimo abakozi 11 yahise ahagarika, ariko bahita bitabaza Urukiko Rwa Afurika y’u Burasirazuba, East African Court of Justice, bavuga ko bahagaritswe binyuranije n’amategeko.

Ubwo Mfumukeko yarahiriraga kuyobora Ubunyamabanga bwa EAC

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved