DRC: Loni yasabye ko hakorwa iperereza ku bwicanyi buherutse guhitana abatari bake

Yanditswe na Kanamugire Emmanuel
Kuya 28 Nzeri 2016 saa 10:30
Yasuwe :
0 0

Umuryango w’Abibumbye watangaje ko hakenewe gukorwa iperereza ryimbitse ku bwicanyi buherutse kubera muri Repubulika Iharanira Demokarasi ya Congo, benshi bakahasiga ubuzima.

Ibi byatangajwe n’Umunyamabanga wa Loni wungirije ushinzwe kurengera uburenganzira bwa muntu, Kate Gilmore kuri uyu wa Kabiri, tariki ya 27 Nzeri 2016.

Yagize ati "Iperereza ritabogamye, rinyuze mu mucyo kandi rifatika rirakenewe kugira ngo abagize uruhare mu bwicanyi bose bagezwe mu butabera.”

Ku wa 19 na 20 Nzeri 2016 nibwo muri Congo, mu Murwa Mukuru Kinshasa habaye ubwicanyi ubwo abatavuga rumwe na Leta bakoze imyigaragambyo yamagana Perezida Kabila, bamusaba kuva ku butegetsi ubwo manda ye izaba irangiye kuwa 20 Ukuboza 2016.

Polisi yo muri Congo ivuga ko ubu bwicanyi bwaguyemo abantu 32, abatavuga rumwe na Leta bagatangaza ko abari hagati ya 50 na 100 aribo bahasize ubuzima.

Ibiro Ntaramakuru by’Abafaransa, AFP, bitangaza ko ku ruhande rwa Loni, Kate Gilmore yavuze ko abantu bagera kuri 49 barimo abasivili n’abapolisi bane aribo baguye muri ubu bwicanyi naho abandi 127 bagakomereka.

Minisitiri w’Ubutabera n’Uburenganzira bwa muntu muri Congo, Alexis Thambwe Mwamba, ubwo aheruka i Genève ku cyicaro cy’Umuryango w’Abibumbye, yatangarije akanama gashinzwe kurengera uburenganzira bw’ikiremwamuntu muri Loni ko nta gahunda ihari yo guhindura Itegeko Nshinga.

Yagize ati “ Amatora azategurwa neza kandi n’itariki azaberaho izatangazwa yamaze kwemeranywaho n’impande zose bireba harimo imiryango mpuzamahanga, ndetse na Loni.”

Loni itewe impungenge n’uko muri Congo hashobora kuvuka ubundi bwicanyi bukaze byatumye Kate ahamagarira impande zihanganye kwigengesera.

Umunyamabanga wa Loni wungirije ushinzwe kurengera uburenganzira bwa muntu, Kate Gilmore yasabye ko hakorwa iperereza ryimbitse ku bwicanyi buheruka kubera muri Congo
Imyigaragambyo y'abatavuga rumwe na Leta muri Congo yahitanye abatari bake

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza