DRC: Abantu barenga 40 bishwe n’inkangu

Yanditswe na Evariste Nsengimana
Kuya 17 Kanama 2017 saa 03:35
Yasuwe :
1 0

Abantu basaga 40 bo mu ntara ya Ituri iherereye mu nkengero z’ikiyaga cya Albert, mu majyaruguru ashyira uburasirazuba bwa Repubulika Iharanira Demokarasi ya Congo, bapfuye baguweho n’umusozi.

Uyu musozi uherereye mu gace kitwa Tora gakunze gukorerwamo imirimo y’uburobyi, watengutse nyuma y’imvura nyinshi imaze iminsi ihagwa.

Umuyobozi mukuru wungirije w’intara ya Ituri, Pacifique Keta, yabwiye Aljazeera dukesha iyi nkuru ko iyi nkangu yatewe n’imvura nyinshi imaze iminsi igwa, asobanura ko ejo hashyinguwe imirambo 28, uyu munsi 12.

Yagize ati “Ejo ku wa Gatatu, twashinguye imirambo 28, uyu munsi turitegura gushyingura irenga 12.”

Ubuyobozi w’iyo ntara butangaza ko uretse aba bapfuye hari n’abandi basaga batanu bwabashije gutabara bajyanwa mu bitaro, ndetse ko hari bamwe mu barenzweho n’umusozi bagishakishwa.

Ikiza nk’iki cyaherukaga kwibasira abanye-Congo mu 2010, aho cyahitanye ubuzima bw’abasaga 19 bo mu Burasirazuba bwa Kibiriga, abandi 27 baburirwa irengero no mu 2002, mu Burasirazuba bwa Uvira, gihitana abarenga 50.

Uretse Congo, ikiza nk’iki giheruka kwibasira Sierra Leone, abarenga 400 barapfa, ku wa Mbere w’iki cyumweru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza