DRC: Abana 155 babaye imfubyi abandi batandukana n’ababarera kubera Ebola

Yanditswe na Evariste Nsengimana
Kuya 24 Nzeri 2018 saa 08:49
Yasuwe :
0 0

Ishami ry’umuryango w’Abibumbye ryita ku bana (Unicef) n’abatanyabikorwa baryo batangaje ko muri Repubulika iharanira Demokarasi ya Congo (DRC) hari abana 155 babaye imfubyi abandi batana n’ababarera kubera icyorezo cya Ebola.

Unicef ivuga ko muri abo bana harimo ababuze ababyeyi bombi, umwe cyangwa ababitaho bishwe na Ebola. Ivuga kandi ko hari n’ababitewe n’uko bamaze igihe kirekire mu kato ku bigo bifasha abayanduye.

Uhagarariye Unicef muri DRC, Dr Gianfranco Rotigliano, avuga ko igiteye impungenge ari uko abo bana bishobora kubatera ibibazo by’imitekerereze birimo kwiheba, ihungabana n’ibindi.

Ati “Intego yacu ni ukurinda no gufasha abana bose bagizweho ingaruka na Virusi ya Ebola. Mu gihe hakigaragara ubwandu bushya, tuzakomeza guhuza abafatanyabikorwa kugira ngo babafashe mu buryo bufatika cyangwa babahe inama.”

Unicef ibaha ubufasha butandukanye burimo ubw’ibiribwa, isanamutima, kubafasha gukomeza kwiga n’ibindi.

Igaragaza ko muri abo bana harimo abasaga 112 bafite imyaka yo kuba bakagiye ku ishuri.

Unicef kandi ivuga ko abana aribo Ebola igiraho ingaruka nyinshi kurusha abandi, akaba ariyo mpamvu yahuguye abantu basaga 219 bashobora kubafasha mu mitekerereze.

Unicef yanohereje inzobere mu mirire zirindwi ku mavuriro atandikanye mu duce Ebola yibasiye cyane turimo aka Beni, Mangina, Makeke na Butembo.

Si ibyo gusa kuko yanahuguye abayobozi b’ibigo n’abarimu 3,163 bo mu bigo 326, bahabwa ubumenyi bujyanye no guhumuriza abana bagizweho ingaruka na Ebola.

Ishami ry’umuryango w’abibumbye ryita ku buzima rivuga ko mu bantu 143 bagaragaje ibimenyetso bya Ebola kugeza ku wa 19 Nzeri, 112 ryemeje ko bayirwaye naho 31 bashobora kuba bayirwaye.

Rivuga kandi ko muri abo 112 yagaragayeho 66 bapfuye barimo inyeshyamba 39.

Abagera kuri 66 bamaze guhitanwa na Ebola muri RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza