Kwamamaza

Dar es Salaam:Ibibazo by’akarere byashyizwe ku meza y’Abakuru b’Ibihugu bya EAC

Yanditswe kuya 8-09-2016 saa 08:46' na Rabbi Malo Umucunguzi


Mu nama ya Cumi na karindwi idasanzwe y’Abakuru b’Ibihugu bya Afurika y’u Burasirazuba , EAC, iteganyijwe kuri uyu wa Kane i Dar Es Salaam muri Tanzania, byitezwe ko iza kuganirirwamo ibibazo byugarije akarere no gutanga imirongo migari ikwiye gukurikizwa.

Itangazo rya EAC rigaragaza ko muri iyi nama, abakuru b’ibihugu barasuzuma raporo y’Inama y’Abaminisitiri ku masezerano y’ubufatanye mu bukungu hagati ya EAC na EU (EU-EAC Economic Partnership Agreement); Raporo ya Benjamin Mkapa wahoze ari Perezida wa Tanzania, ku mwuka w’ibiganiro mu Burundi; Raporo ku bibazo bya Sudani y’Epfo; inakire indahiro y’Umunyamabanga Mukuru wungirije wa EAC, Christophe Bazivamo.

Depite Martin Ngoga uhagarariye u Rwanda mu Nteko Ishinga Amategeko y’Umuryango wa Afurika y’u Burasirazuba, EALA, yabwiye The New Times ko yiteze imirongo ngenderwaho iratangwa n’abakuru b’ibihugu ku bijyanye n’ibibazo by’umutekano mu karere n’ amasezerano y’ubufatanye bwa EAC na EU, ibihugu bigize EAC bikomeje gushyiramo imbaraga.

Mu minsi ishize Minisitiri w’Ubucuruzi n’Inganda mu Rwanda, François Kanimba, na mugenzi we wa Kenya Adan Mohamed bashyize umukono kuri ayo masezerano mu gihe ibihugu nka Tanzania, Uganda n’u Burundi hagitegerejwe umwanzuro wa nyuma bizafata.

Ngoga yagize ati “Ndahamya ko ibi ari ibintu byihutirwa mu gihe nk’iki. Urwego rukuru muri uyu muryango rusanzwe rutanga imirongo ngenderwaho mu gihe hari kugaragara imbogamizi, ibi ni nabyo twiteze.’’

“Hari ibintu bimaze kugerwaho ndetse umuntu yakwishimira birimo kuba Sudani y’Epfo yaramaze kuzuza ibisabwa ngo yinjire muri uyu Muryango. Hari n’ibindi twagiye tugeraho mu bijyanye no kwishyira hamwe nk’ibihugu. Twiteze ko iyi nama iraba umusemburo wo gutuma n’ibindi bigerwaho.’’

Depite Abubakar D. Abdi Ogle nawe wo muri EALA, yavuze ko yiteze ko iyi nama iratuma ibihugu byose bisinya kuri aya masezerano ya EPA yitezweho gufasha mu rugendo rwo kwishyira hamwe nk’ibihugu, kwihutisha iterambere n’ubucuruzi by’umwihariko.

Yavuze ko iyi nama initezweho gushaka umuti ku bibazo by’umutekano bikomeje guhungabanya uburenganzira bwa muntu mu Burundi na Sudani y’Epfo.

Ati “Aya makimbirane amaze igihe kandi iyi nama yitezweho gutanga umurongo kuri iki kibazo.’’

Depite Ogle yavuze ko iyi nama igomba no kugena uburyo bwo gutanga imisanzu muri EAC, bigatangirira ku bihugu bigize uyu muryango byuzuza inshingano biba byariyemeje mbere mu bijyanye n’uyu muryango.

Mu mwaka w’ingengo y’imari washize, u Rwanda na Kenya ngo nibyo byabashije gutanga imisanzu yabyo nk’uko byayisabwaga muri EAC.

Inkuru bifitanye isano

- EAC mu ihurizo nyuma y’ibura ry’imisanzu y’ibihugu n’abaterankunga bakavanamo akabo karenge

- Ni iki u Rwanda rwiteze mu masezerano y’ubucuruzi n’ibihugu by’u Burayi?


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved