Covid-19: OMS yasabye ibihugu kudatinya urukingo rwa AstraZeneca ruvugwaho kudahangana n’ubwoko bushya

Yanditswe na Ntabareshya Jean de Dieu
Kuya 12 Gashyantare 2021 saa 12:51
Yasuwe :
0 0

Ishami ry’umuryango w’Abibumbye ryita ku buzima OMS, ishami ry’Afurika ryahamagariye uyu mugabane gukoresha urukingo rwakozwe na Kaminuza ya Oxford mu Bwongereza rwa AstraZeneca, no mu bihugu byagiye bigaragaramo ubwoko bushya bwa Covid-19 nubwo hari impungenge zari zagaragajwe ko uru rukingo rutabasha guhangana n’ubwoko bushya bwa Covid-19.

Umuyobozi wa OMS, muri Afurika, Dr Matshidiso Moeti yabitangaje kuri uyu wa Kane, avuga ko “nubwo urukingo ruvura ubwoko bwose bwa Covid-19 ari cyo cyizere cyacu gikomeye ariko gukumira umubare w’abarwara n’abajya mu bitaro wiyongera nabyo ni ingenzi.”

Uyu muyobozi avuga ko niba gukingira byatuma umubare w’abandura n’abaremba ugabanyuka byarokora ubuzima bwa benshi.

Dr Moeti yavuze ko mu minsi 28 ishize ari bwo icyorezo cya Covid-19 cyakajije umurego muri Afurika nyuma y’uko mu bihugu birimo Ghana, Kenya, Comores, Botswana, Mozambque na Zambia bigaragayemo ubwandu bushya bwa Covid-19 yo mu bwoko bwa B.1351 yandura mu buryo bwihuse.

Uretse kuba mu bihugu bya Afurika haragaragaye ubwoko bushya bwa Covid-19, hari n’impungenge ko bimwe mu bihugu by’uyu mugabane byigize ntibindeba mu guhangana n’iki cyorezo.

Ubushakashatsi bw’ibanze bwakozwe na Kaminuza ya Witwatersrand yo muri Afurika na Kaminuza ya Oxford ku rukingo rwa AstraZeneca bwagaragaje ko rudahangana ku buryo bukomeye n’ubwandu bushya bwa Covid-19.

Mu bantu 2000 bakoreweho ubushakashatsi barimo abafite ubuzima bwiza n’abakiri bato, nta n’umwe wapfuye ariko ntabwo urukingo rwagaragaje kugira icyo rubafasha mu kutandura.

Muri iki cyumweru, Leta ya Afurika y’Epfo nka kimwe mu bihugu byugarijwe n’ubwoko bushya bwa Covid-19, yatangaje ko yabaye isubitse ibikorwa byo gukingira abaturage bayo COVID-19 ikoresheje urukingo rwakozwe na AstraZeneca.

OMS yatangaje ko igikenewe cyane ari ukurinda abantu kwandura no kuremba cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .