Covid-19: Indimi ebyiri z’u Burundi, amakosa abaturage bashobora kwishyura

Yanditswe na Bukuru JC
Kuya 10 Gashyantare 2021 saa 08:16
Yasuwe :
0 0

U Burundi bukomeje kwibazwaho mu ruhando mpuzamahanga, nyuma yo kwemera ko bwugarijwe na Coronavirus ariko nta gikorwa mu kuyihashya.

Kuva icyorezo cyatangira, abantu batatu nibo bamaze gutangazwa ko bishwe na Coronavirus muri icyo gihugu. Ubuyobozi bw’icyo gihugu bushinjwa gusuzugura icyorezo kandi kiri kugarika benshi.

Inzobere mu bijyanye n’ibyorezo, Côme Konakuze, yabwiye Jeune Afrique ko u Burundi buzasarura ibyo bwabibye, kuko hashize igihe abayobozi b’icyo gihugu bakwirakwiza imvugo zibiba urwikekwe mu baturage ku buryo batazi icyo gukora no kureka.

Umuryango Mpuzamahanga wita ku Buzima (OMS) ku bufatanye n’Ihuriro mu by’inkingo (Gavi), tariki 3 Gashyantare batangaje ibihugu bizahabwa urukingo rwa Covid-19 muri gahunda yiswe Covax igamije kugeza inkingo kuri bose. Mu bihugu bya Afurika 47 byashyizwe kuri urwo rutonde, u Burundi ntibugaragaramo. Bivuze ko uyu 2021, icyo gihugu nta rukingo kizakira.

Byaje bihurirana n’amagambo aherutse kuvugwa na Perezida Ndayishimiye mu mpera z’umwaka ushize, wemeje ko nta Covid-19 irangwa mu Burundi. Ati “Ahubwo abandi baza inaha kuhivuriza bagashaka kuhaguma nyuma yo gukira. Imana niyo iturinze.”

Nyuma yo kujya ku butegetsi muri Kamena 2020, Evaritse Ndayishimiye yagaragaraga nk’uzanye impinduka mu buryo igihugu cyafataga icyorezo. Bitandukanye na Pierre Nkurunziza yasimbuye, Ndayishimiye yazanye impinduka nshya avuga ko agiye guhashya icyo cyorezo, yemeza ko ibiciro by’amazi n’ibindi bikoresho by’isuku nk’isabune bigabanywa kugira ngo byorohere abaturage kwirinda.

Nyamara Jeune Afrique igaragaza ko imvugo yagiye ihinduka mu Burundi, rimwe bagaragaza ko icyorezo gihari ubundi bakavuga ko nta gihari.

Tariki 28 Mutarama 2021, Perezida Ndayishimiye yumvikanye avuga ko udupfukamunwa na Guma mu rugo aribyo bikwirakwiza Covid-19 kurusha ibindi byose. Yavuze ko ariyo mpamvu atatuma igihugu cye kijya muri Guma mu rugo.

Mu ntangiriro za Mutarama 2021, Minisitiri w’Ubuzima, Dr Thaddée Ndikumana, yagaragaje impungenge avuga ko icyorezo gikomeje gukaza umurego. Hari nyuma yo kubona abarwayi 48 mu masaha 24. Icyo gihe yavuze ko abaturage bakwiriye kwirinda nubwo atasobanuye uko babigeza.

Hari ibinyamakuru bimaze iminsi bitangaza ko ubukana bwa Covid-19 mu Burundi burenze kure ubutangazwa na Leta. Havugwa ko mu mashuri hagiye hagaragara imibare myinshi y’abandura ariko Leta ntibitangaze.

Tariki 10 Mutarama, hari umwarimu watangaje ko kuri Lycée de Mwaro habonetse abanyeshuri 84 basanzwemo Covid-19. Ntaho mu mibare Leta yagiye itangaza iyo yo muri Mwaro yagaragaye.

Rwagati muri Mutarama uyu mwaka, kuri Seminari nto ya Bujumbura hari abantu 68 basanzwemo icyorezo. Mu Majyaruguru muri Muyinga na Kayanza hari abaganga batangaje ko abarwayi batangiye kurenga ubushobozi bw’ibitaro.

Ibyo byose ntaho byigeze bitangazwa mu buryo bwemewe na Leta, nyamara Minisitiri w’Ubuzima Nduwimana aherutse kuvuga ko abatangaza ibyo ari abanzi b’igihugu.

Igiteye inkeke amahanga, ni uko icyo gihugu cyanze no kwiyandikisha mu bizahabwa inkingo. Minisitiri Nduwimana yavuze ko batazemera abantu baza kugeragereza inkingo ku baturage b’u Burundi, mu gihe izo nkingo zitangwa bizwi ko zamaze kwemezwa na OMS.

Inzobere Konakuze yavuze ko uko kwirara k’u Burundi, kuzagira ingaruka ku baturage bose muri rusange. Ibyo avuga ko bizatuma mu gihe kiri imbere nta muturage w’u Burundi uzemererwa kwinjira mu bindi bihugu kuko icyemezo cy’uko umuntu yakingiwe kizajya gisabwa aho umuntu agiye hose.

U Burundi bwemeye ko Covid-19 mu gihugu ihari gusa nta mbaraga bwashyize muri gahunda zo kuyihashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .