Congo iratabaza Loni kwirukana FDLR n’inyeshyamba za Sudani y’Epfo

Yanditswe na Mathias Hitimana
Kuya 12 Mutarama 2017 saa 11:40
Yasuwe :
0 0

Ambasaderi wa Repubulika Iharanira Demokarasi ya Congo mu Muryango w’Abibumbye , Ignace Gata Mavita, yasawubye gukora uko ushoboye inyeshyamba za FDLR n’izo muri Sudani y’Epfo zigasubizwa mu bihugu byazo.

Iyi ntabaza ya Congo irumvikana mu majwi y’imbwirwaruhame yabwiwe Loni, yashyizwe ku rububuga rwa Radio Okapi, kuri uyu wa Gatatu.

Mavita yavuze ko gahunda Ingabo za Congo Kinshasa (FARDC) zari zifatanyijemo n’iz’Umuryango w’Abibumbye ziri muri iki gihugu (MONUSCO), yo kurandura burundu imitwe yitwaje intwaro muri Congo ko itagize icyo igeraho gihagije.

Yagize ati “ Raporo zitandukanye zigaragaza ko imitwe y’abanyamahanga yitwaje intwaro irushaho kwiyongera muri Congo, irimo FDLR, ADF, n’indi mitwe itandukanye ikomoka imbere mu gihugu. Ingabo z’igihugu cyacu ntako zitagize ngo ziyirandure, ariko nk’uko raporo ibigaragaza, byashoboka haramutse hashyizwemo izindi mbaraga zidasanzwe.”

Yavuze ko MONUSCO na FARDC byafatanyije ariko ntibyabyara umusaruro wari witezwe, avuga ko byagira icyo bimara baramutse basimbuje umutwe w’ingabo za Loni zishinzwe gutabara.

Yasabye ko umugambi wo gucyura inyeshyamba za FDLR n’imiryango yazo n’indi mitwe ukwiye kwihutishwa.

Yanavuze ko inyeshyamba za FDLR zamaze gushyirwa mu nkambi ya Karabayonga iherereye mu Majyaruguru ya Kivu, n’iri ahitwa Walungu mu Majjyepfo ya Kivu na Kisangani zigomba gucyurwa mu gihugu cyazo vuba na bwangu.

Congo imaze imyaka myinshi yaribasiwe n’imitwe yitwaje intwaro, bigatera intambara z’urudaca, ndetse yatumye abaturage benshi bapfa, abandi ibihumbi n’ibihumbi bahungira mu bihugu by’ibituranyi birimo n’u Rwanda.

Inyeshyamba zo muri Sudani y’Epfo zahungiye muri Congo mu bushyamirane hagati ya Perezida Salva Kiir w’icyo gihugu na Visi Perezida we Riek Machar.

Inyeshyamba za FDLR zo zishinjwa kuba zigizwe na bamwe basize bakoze Jenoside yakorewe Abantutsi mu Rwanda mu 1994, abandi bakaba baracengejwemo ingengabitekerezo ya Jenoside.

Ignace Gata Mavita wa Lufuta uhagarariye RDC muri Loni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza