Kwamamaza

Centrafrique: Urupfu rw’umusirikare ukomeye rwatumye batandatu bahasiga ubuzima

Yanditswe kuya 6-10-2016 saa 09:43' na Jean Pierre Tuyisenge


Imirwano yongeye kubura igwamo abantu batandatu mu Mujyi wa Bangui nyuma y’uko umuyobozi ukomeye mu ngabo za Leta witwa Marcel Mombéka yiciwe mu gace gatuyemo Abayisilamu kazwi nka PK5, ku wa kabiri tariki ya 4 Ukwakira 2016.

Uyu musirikare ngo yishwe n’itsinda ryiyise iryo kwirwanaho (groupes d’autodéfense) ryo muri ako gace bituma haduka imvururu zaguyemo batandatu habariwemo Mombéka, hakomerekeramo abandi batandatu harimo n’umuhungu w’uyu musirikare, nkuko ubuyobozi bw’ibitaro bagiye kuvurirwaho bwabibwiye Jeune Afrique dukesha iyi nkuru.

Minisitiri w’Umutekano mu gihugu, Jean-Serge Bokassa, yemeje amakuru y’urupfu rwa Mombéka avuga ko yishwe n’itsinda ry’abantu bo mu gace kabamo abayisilamu (PK5), asaba ko haba umutuzo n’amahoro ndetse n’ubufatanye mu guhangana n’abashaka guhungabanya umutekano.

Yagize ati “ Marcel Mombéka yishwe n’abantu bo mu gace ka PK5 kayoborwa n’abantu biyita abirwanaho”.

Nyuma y’urupfu rw’uwo musirikare, aborozi batatu nabo biciwe mu mirwano yahuje ingabo za Leta n’umutwe w’abirwanaho wo mu gace ka PK5.

Ingabo z’Umuryango w’Abibumbye ziri mu butumwa bwo kugarura amahoro muri icyo gihugu MINUSCA, zahise zisohora itangazo ryamagana ibyo bikorwa. Ryagiraga riti “ Ibi bikorwa bihungabanya umutekano twaharaniye dufatanyije n’ingabo za Leta, ntidushobora gukomeza kubyihanganira.”

Centre Afrika ni igihugu gikize ku mabuye y’agaciro, ariko cyazahajwe n’intambara yatangiye ahagana mu mwaka wa 2013, ishyamiranyije abarwanyi b’umutwe wa Seleka ugizwe ahanini n’abayisilamu bashyigikiwe n’uwahoze ari Perezida w’icyo gihugu Michel Djotodia (2013-2014), n’irindi tsinda ry’abakrisitu rya Anti Balaka baribashyigikiwe na Perezida François Bozizé wayoboye kuva 2003 kugera 2013.

Amakimbirane y’aya matsinda yatumye amagana n’amagana y’abaturage bata ingo zabo, bituma ku wa 5 Ukuboza 2013 Umuryango w’Abibumbye usinya amasezerano yo koherezayo ingabo zishinzwe kugarura amahoro.

Urupfu rwa Marcel-Mombéka rwakuruye imvururu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved