Centrafrique: Abari mu buyobozi bw’imitwe yitwaje intwaro bagejejwe imbere ya ICC

Yanditswe na Dufitumukiza Salathiel
Kuya 30 Mutarama 2021 saa 09:12
Yasuwe :
0 0

Ku wa Gatanu tariki 29 Mutarama 2021, bamwe mu bayobozi b’imitwe y’abarwanyi bitwaje intwaro igamije guhungabanya umutekano wa Centrafrique, bagejejwe imbere y’Urukiko Mpuzamahanga Mpanabyaha (ICC) ruri i La Haye mu Buholandi.

Umuyobozi w’ihuriro ry’abarwanyi ba Séléka rigizwe n’abahoze ari Ingabo za François Bozizé wavuye ku butegetsi mu 2013, Mahamat Said Abdel Kani, yagejejwe imbere ya ICC ku wa Gatanu; kimwe n’abandi bayobozi bakuru muri iryo huriro babiri Alfred Yekatom na Patrice-Edouard Ngaïssona.

Ihuriro rya Séléka kandi ririmo umutwe w’abarwanyi bagendera ku mahame y’idini ya Islam uhora uhanganye n’Abanya-Centrafrique b’Abakirisitu.

Abdel Kani wafashwe ku wa Mbere w’iki Cyumweru nyuma yo gushyirirwaho impapuro zo gutabwa muri yombi, ashinjwa ibyaha byibasiye inyokomuntu n’iby’intambara birimo gutoteza, kugirira nabi abo badahuje imyemerere, gukora iyicarubozo no kurigisa abantu.

Uwo mugabo w’imyaka 50 wamaze kugezwa mu gihome cya ICC, umwunganizi we mu mategeko yavuze ko arenganywa, ariko we ku giti cye ntiyigeze agira icyo avuga ku byaha ashinjwa.

Mu mashusho yafashwe ari aho afungiwe akoherezwa mu rukiko, Abdel Kani yagize ati“Ubu ntacyo navuga nzisobanura igihe kigeze. Sindamenya neza uburenganzira bwanjye; nzi neza ko nk’umuntu ushinjwa nkiri umwere.”

Biteganyijwe ko urubanza rw’aba bagabo ruzatangira byeruye ku wa 9 Gashyantare 2021.

Ifatwa ry’abayobozi ba Séléka ribaye nyuma y’imvururu zimaze iminsi muri Centrafrique, zashojwe na François Bozizé wari ugamije kuburizamo amatora y’Umukuru w’Igihugu yabaye ku wa 27 Ukuboza 2020.

Nyuma y’uko Perezida w’icyo gihugu wanatsinze ayo matora, Faustin-Archange Touadéra, atewe ingabo mu bitugu n’Umuryango w’Abibumbye, u Burusiya n’u Rwanda, Séléka yakomeje kugaba ibitero mu bice bitandukanye by’icyo gihugu igamije guhirika ubutegetsi no kwigarurira uduce tumwe.

Umugambi wayo wakomeje gupfuba mu bihe bitandukanye, kuko yakomwe mu nkokora kenshi igasubizwa inyuma, bikaba bigeze n’aho abayobozi bayo bafatwa.

Mahamat Said Abdel Kani ashinjwa ibyaha by'intambara n'ibyibasiye inyokomuntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .