Centrafrique: Intambara yongeye kurota, abasaga 10 baguye mu mirwano

Yanditswe na Philbert Girinema
Kuya 18 Nzeri 2016 saa 09:02
Yasuwe : XX
0

Imirwano muri Repubulika ya Centrafrique yongeye kubura mu giturage kiri mu bilometero 350 mu Majyaruguru y’Umurwa Mukuru Bangui, imiryango itandukanye ikaba yemeza ko haguyemo abagera ku icumi.

Imitwe isanzwe ishyamiranye ya anti-Balaka na Seleka niyo yakozanyijeho guhera ku mugoroba wo kuwa Gatanu ushyira kuwa Gatandatu, nubwo impamvu z’iyi mirwano mishya zitaramenyekana.

BBC yatangaje ko intumwa z’Umuryango w’Abibumbye ziri kugarura amahoro muri Centrafrique, Minusca, zitewe inkeke n’iyi mirwano yahitanye abagera ku 10, nubwo amakuru aturuka mu biro by’Umukuru w’Igihugu avuga ko bagera kuri 26.

Umuvugizi wa Minusca, Vladimir Monteiro, yagize ati ‘‘Icyo tuzi dushingiye ku makuru bagenzi bacu bafite, ni uko inyeshyamba zahoze ari iza Seleka n’iza anti-Balaka zihanganye muri ako gace. Ingabo zacu zabigizemo uruhare ngo imirwano idakwira agace kose kandi ntihungabanye abaturage.’’

‘‘Hari indi mirwano ahitwa Kaga-Bandoro. Aho naho ingabo zacu zituruka muri Pakistan zafashe ingamba zo kurinda abaturage, ibitaro n’abavuye mu byabo.’’

Minusca yasabye impande zihanganye gushyira intwaro hasi, inamagana ibyabaye birimo ubugizi bwa nabi, gusahura n’ibindi, aho yatangaje ko itazihanganira ko umudendezo wari umaze kuboneka binyuze mu matora y’Umukuru w’Igihugu akomwa mu nkokora.

Centrafrique iri mu bihe bikomeye kuva muri Werurwe 2013, ubwo inyeshyamba za Seleka zafataga ubutegetsi zihiritse François Bozize, ndetse aya makimbirane ashingira cyane ku guhangana kw’Abayisilamu n’Abakirisitu.

Ibihumbi by’abaturage bimaze kwicwa n’ibihumbi amagana bava mu byabo. Iki gihugu kirimo ingabo zigera ku 11,000 z’Umuryango w’Abibumbye, ndetse kuva mu 2014 u Rwanda rufiteyo umutwe w’abasirikare ukora ibikorwa birimo kurinda Umukuru w’Igihugu n’abandi bayobozi bakuru, bakanacunga umutekano w’izindi nzego za Leta zikomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza