Kwamamaza

CEDEAO yemeje Abdoulaye Bathily nk’umukandida ku buyobozi bwa Komisiyo ya AU

Yanditswe kuya 30-08-2016 saa 09:04' na Rabbi Malo Umucunguzi


Amatora y’Umuyobozi wa Komisiyo y’Umuryango wa Afurika Yunze Ubumwe, AU, agomba gusubirwamo muri Mutarama 2017, kuko ayageragejwe muri Nyakanga mu nama y’abakuru b’ibihugu yabereye i Kigali, muri batatu bahatanaga habuze uwuzuza bibiri bya gatatu by’amajwi yose, mu nshuro zirindwi bagerageje gutora.

Abakuru b’ibihugu bigize Umuryango w’Ubukungu bwa Afurika y’u Burengerazuba, CEDEAO, bemeje Abdoulaye Bathily ukomoka muri Senegal nk’umukandida rukumbi uzahagararira icyo gice cya Afurika.

Mbere y’amatora aheruka yabereye mu Rwanda, uyu muryango ugizwe n’ibihugu 15 byiganjemo ibikoresha Igifaransa, wazamuye ijwi kenshi uvuga ko mu bakandida bari bahari nta n’umwe wujuje ibisabwa, isaba ko amatora yasubikwa. Bamwe bagiye babihuza n’uko bashakaga gutanga umukandida mu gihe babigerageje mbere bagasanga igihe cyabarenganye.

Nubwo abandi bakuru b’ibihugu bateye utwatsi icyo gitekerezo, amatora asa n’ayagenze mu buryo bwabo, kuko mu bihugu 51 byatoye, abakandida bagiye bakuranwamo kugeza kuri Dr Pelonomi Venson-Moitoi wari usigayemo wenyine, maze ibihugu 28 birifata 23 bitora yego, abura atyo bibiri bya gatatu bigenwa n’itegeko ry’amatora ku buyobozi bwa Komisiyo ya AU.

Abakandida batatu bahatanaga mu nama iheruka bari Minisitiri w’Ububanyi N’amahanga wa Botswana, Pelonomi Venson-Moitoi, uwa Guinée équatoriale, Agapito Mba Mokuy n’uwahoze ari Visi Perezida wa Uganda, Specioza Wandira-Kazibwe.

Bathily usanzwe ari intumwa yihariye y’Umunyamabanga Mukuru w’Umuryango w’Abibumbye muri Afurika yo hagati, yemejwe kuwa 27 Kanama, ubwo abakuru b’ibihugu bigize CEDEAO bahuriraga i Nairobi muri Kenya, bitabiriye inama yahuje Afurika n’u Buyapani, TICAD VI.

Itangazo ryashyizwe ahagaragara nyuma y’iyo nama, rigira riti ‘‘Abakuru b’ibihugu na za guverinoma za Afurika y’u Burengerazuba biyemeje kuzatora Abdoulaye Bathily, kugira ngo asimbure Umunyafurika y’Epfo, Dlamini Zuma manda ye iheruka kwigizwa inyuma’’.

Gusa nubwo ashyigikiwe n’ibi bihugu, Bathily ashobora kuzaba ahanganye n’abakandida bakomeye barimo Jakaya Kikwete uheruka kurangiza manda ya Perezida wa Tanzania, byitezwe ko nawe kandidatire ye itazaburamo.

Kuwa 9 Kamena Komisiyo ya AU yatangaje ko amatora y’Umuyobozi wa Komisiyo ya AU, Umwungirije n’abakomiseri umunani yongeye gufungurwa, ibihugu byose bigize AU bikaba byaramenyeshejwe uko kandidatire zigomba gutangwa kuri iyo myanya 10.

Kandidatire z’aba bayobozi zigomba kugezwa ku bakuru b’ibihugu nibura mbere y’amezi atatu ngo amatora abe, akaba ategerejwe mu nama y’Abakuru b’ibihugu na za guverinoma izabera ku cyicaro gikuru cya AU, i Addis Ababa muri Ethiopia, kuwa 30-31 Mutarama 2017.

Kandidatire ku Muyobozi wa Komisiyo n’umwungirije zizarangiza gutangwa mu biro bishinzwe amategeko muri AU bitarenze kuwa 30 Nzeli 2016, mu gihe ku ba komiseri ho ibihugu bizatanga abakandida mu miryango bibarizwamo bitarenze kuwa 19, zikazagezwa muri Komisiyo ya AU bitarenze uwa 16 Nzeli.

Abakandida bose bazamenyekana bitarenze kuwa 14 Ukwakira 2016. Umuyobozi wa Komisiyo n’umwungirije batorwa n’abakuru b’ibihugu, abakomiseri bagatorwa na ba Minisitiri b’Ububanyi n’Amahanga n’abahagarariye ibihugu byabo muri AU.

CEDEAO yemeje Abdoulaye Bathily nk’umukandida ku buyobozi bwa Komisiyo ya AU

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved