Byemejwe ko igice cy’Indege MH370 yo muri Malaysia cyabonetse muri Tanzania

Yanditswe na Philbert Girinema
Kuya 15 Nzeri 2016 saa 05:16
Yasuwe :
0 0

Igice cy’Indege cyabonetse ku nkombe y’Ikirwa cyitwa Pemba muri Tanzania muri Nyakanga 2015, byemejwe ko ari igisiganzwa cya MH370 yo muri Malaysia yaburiwe irengero igiye i Beijing mu Bushinwa.

Kuri uyu wa 15 Nzeri 2016 nibwo Minisiteri Ishinzwe Ubwikorezi muri Malaysia yemeje ko igice cy’indege cyari cyarajyanywe muri Australia giturutse muri Tanzania kugira ngo gikorerwe ubugenzuzi basanze ari icya MH370.

Iyo ndege yaburiwe irengero tariki ya 8 Werurwe 2014 ivuye Kuala Lumpur yerekeza i Beijing mu Bushinwa, abahanga basanze icyo gice gifite ibirango n’ibindi bimenyetso by’indege za Malaysia Airlines.

Nubwo hibazwaga ko iyi ndege yaba yarakoreye impanuka mu nyanjya y’Abahinde ibyayo bikomeje kuba amayobera kugeza magingo aya.

Minisiteri y’Ubwikorezi yagize iti"Abahanga berekanye ko igice cy’indege cyabonetse gikomoka kuri MH370 yo muri Malaysia.”

Itangazo ry’iyi minisiteri rikomeza rigira riti “hazakomeza gukorwa isuzuma kugira ngo harebwe icyaba cyihishe inyuma y’ibura ry’iriya ndege.”

Umushakashatsi wo muri Amerika, Blaine Gibson, ku wa Mbere tariki ya 12 Nzeri 2016 yatanze ibindi bice by’indege muri Australia ngo bikorweho isuzuma acyeka ko byaba ari ibya MH370 yo muri Malaysia gusa yavuze ko ibyo bice byabaye umukara ku buryo bishobora kuba byaratwitswe n’umuriro.

Abakora ibikorwa by’ubutabazi bo muri Australia bakomeje gushakisha mu kuzimu kw’Injyanja y’Ubuhinde bareba ko imyambaro irinda abantu kurohama abagenzi bari bambaye ariho yaba iherereye .

Irengero ry'Indege MH370 rikomeje kuba amayobera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244