Burundi: Nyamitwe yasimbuwe ku mwanya wa Minisitiri w’Ububanyi n’Amahanga n’uwahoze ayobora Imbonerakure

Yanditswe na Mukaneza M.Ange
Kuya 20 Mata 2018 saa 10:35
Yasuwe :
0 0

Perezida w’u Burundi, Nkurunziza Pierre, yahinduye bamwe mu bagize Guverinoma, aho mu bahawe imyanya barimo Ezechiel Nibigira wagizwe Minisitiri w’Ububanyi n’Amahanga asimbuye Alain Aimé Nyamitwe.

Kuwa 19 Mata 2018 nibwo Nkurunziza yakoze amavugurura muri Guverinoma ye, ni mu gihe habura igihe kitagera ku kwezi ngo Abarundi bajye muri Kamarampaka igamije gukuraho umubare wa manda zigenerwa pereizda.

Nibigira wabaye Ambasaderi w’u Burundi muri Kenya, yamenyekanye cyane ubwo yari Umuyobozi w’Urubyiruko rw’Ishyaka rya CNDD FDD riri ku butegetsi ruzwi nk’Imbonerakure.

Uyu mugabo wayoboraga Komisiyo ishinzwe Ubukungu mu Nteko Ishinga Amategeko y’u Burundi, aza mu nkoramutima zikomeye za Nkurunziza ndetse mu matora ya Perezida yabaye mu 2010 niwe wari uhagarariye ibikorwa byo kumwamamaza. Agiye kuri uyu mwanya asimbuye Alain Aimé Nyamitwe wari warahawe izi nshingano mu 2015, nyuma gato y’uko umugambi wo guhirika Nkurunziza uburijwemo.

Nyamitwe utigeze ahabwa undi mwanya muri guverinoma ni umuvandimwe wa Willy Nyamitwe, Umuvugizi wa Perezida Nkurunziza.

Uretse Nyamitwe hari n’abandi ba minisitiri batigeze bongera kugaragara muri Guverinoma barimo Nestor Bankumukunzi wari Minisitiri w’Itumanaho wasimbuwe na Evelyne Butoyi; Dr Josiane Nijimbere, wari Minisitiri w’Ubuzima no kurwanya Sida wasimbuwe na Dr Thaddé Ndikumana; Niyonkuru Pélate wari Minisitiri w’Ubucuruzi yasimbuwe na Jean Marie Niyokindi, mu gihe Ndayizeye Célestin wari Ministiri w’Ibidukikije.

Guverinoma y’u Burundi ubu igizwe n’abaminisitiri 21, bavuye kuri 20 bari basanzwe.

Nibigira Ezechiel wahoze ayobora Urubyiruko rw'Imbonerakure mu Burundi yagizwe Minisitiri w’Ububanyi n’Amahanga asimbuye Alain Aimé Nyamitwe
Alain Aimé Nyamitwe yari Minisitiri w’Ububanyi n’Amahanga w'u Burundi kuva mu 2015

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza