Burundi: Loni yamaganye indirimbo ihamagarira Imbonerakure gutera inda abagore batavuga rumwe n’ubutegetsi

Yanditswe na Evariste Nsengimana
Kuya 20 Mata 2017 saa 11:44
Yasuwe :
0 0

Ishami rya Loni ryita ku burenganzira bwa muntu, ryamaganye ibikorwa umutwe w’Imbonerakure uheruka gukora byo gusembura ubugizi bwa nabi, birimo gukangurira imbonerakure gutera inda abagore batavuga rumwe n’ubutegetsi.

Ikigambiriwe n’izi mbonerakure ni ukugirango abagore n’abakobwa batazishyigikiye nibaterwa inda bazazibyarire bityo umubare wazo urusheho kugenda wiyongera.

Amashusho agaragaza Imbonerakure (umutwe ushingiye ku ishyaka riri ku butegetsi, CNDD-FDD), ziri muri ibi bikorwa,yatangiye gukwirakwizwa ku mbuga nkoranyambaga mu ntangiro za Mata.

Yagaragazaga izisaga 100 zo mu Ntara ya Kirundo yo mu majyaruguru y’u Burundi, ziruka ziririmba indirimbo zihamagarira gutera inda abagore n’abakobwa no kwica abatavuga rumwe na CNDD-FDD.

Mu itangazo Loni yasohoye kuwa 18 Mata 2017, Umuyobozi ushinzwe guhuza ibikorwa by’uburenganzira bwa muntu muri Loni, Zeid Ra’ad Al Hussein yanenze ibikorwa by’Imbonerakure, avuga ko byemeza ko ibivugwa n’abahunze u Burundi ari ukuri.

Yagize ati “Iriya ndirimbo y’Imbonerakure ihamagarira gusambanya abagore, iteye impungenge, by’umwihariko iremeza neza ibivugwa n’impunzi z’Abarundi zahunze, ku bikorwa by’iterabwoba n’ubugizi bwa nabi bukorwa n’uriya mutwe.”

Loni ivuga ko nubwo CNDD-FDD yahise isohora itangazo ryamagana ibikorwa byakozwe n’izo mbonerakure, hari n’amakuru avuga ko ibikorwa byazo bitegurwa na bamwe mu bayobozi bakuru, aho iryo tangazo rikomeza rigira riti “Kuriya kwamagana ntacyo bivuze. Aho guhagarika ibi bikorwa, abayobozi bakuru bakomeza kubishyigikira.”

Zeid Ra’ad Al Hussein akomeza avuga ko Leta ikwiriye guhana yihanukiriye abijandika mu bugizi bwa nabi nk’ubu aho kubishyigikira.

Uyu muyobozi kandi agaruka kuri raporo zigaragaza ibikorwa by’iyicarubozo n’ihohotera bamwe mu bayobozi n’inzego z’umutekano b’ibihugu bya Afurika bakorera abaturage, aho avuga ko byagize ingaruka bigatuma abaturage basanga ibihumbi 400 bahunga mu myaka ibiri ishize.

Umuyobozi ushinzwe guhuza ibikorwa by’uburenganzira bwa muntu muri Loni, Zeid Ra’ad Al Hussein

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244