Burundi: Abarundi mu myigaragambyo yamagana icyemezo cya Loni

Yanditswe na Jean Pierre Tuyisenge
Kuya 1 Ukwakira 2016 saa 04:28
Yasuwe : XX
0

Amashyirahamwe agera ku bihumbi bitandatu yabyukiye mu myigaragambyo yo kwamagana icyemezo cyafashwe n’Umuryango w’Abibumbye cyo kohereza itsinda ry’abahanga bakora iperereza ku byaha byakozwe mu Burundi kuva mu mwaka wa 2015.

Ayo mashyirahamwe yamagana ibivugwa mu cyegeranyo cya Loni cyasohotse ku wa 20 Nzeri 2016, cyashinjaga Leta y’u Burundi guhonyanga uburenganzira bw’ikiremwamuntu, n’icyemezo cyafashwe n’uwo muryango ejo ku wa 30 Nzeri 2016 i Geneve mu Busuwisi.

BBC dukesha iyi nkuru ivuga ko abitabiriye iyo myigaragambyo bahuriye mu kibuga cyitiriwe Ubwigenge bw’u Burundi bakomeza bagana ku biro bikoreramo ishami ry’Umuryango w’Abibumbye ryita ku burenganzira bw’ikiremwamuntu mu Burundi.

Abo bari bitwaje ibyapa byanditseko amagambo atandukanye, nk’ahakana ikorwa rya Jenoside Loni iherutse gushinja icyo gihugu mu cyegeranyo yakoze.

Abahanga ba Loni baherutse gukora iperereza basohora icyegeranyo, aho bavugaga ko hakozwe ibyaha bikomeye by’ihonyangwa ry’uburenganzira bw’ikiremwa muntu ndetse bavuga ko bafite n’amazina y’abantu bagize uruhare muri ibyo byaha.

Kuva icyo cyegeranyo cyashyirwa hanze hatangiye kujya haba imyigaragambyo itandukanye icyamagana, abayitabiriye bakavuga ko ibyatangajwe nta shingiro bifite.

Ejo ku wa Gatanu, Ishami ry’Umuryango w’Abibumbye ryita ku Burenganzira bw’ikiremwamuntu ku Isi ryatoye ku majwi 19, iyoherezwa ry’itsinda ry’abahanga bajya mu Burundi gukora iperereza ku byaha byakozwe muri icyo gihugu kuva mu mwaka wa 2015.

Leta ivuga ko idashobora kwemera gukorana n’iryo tsinda, ndetse no ku wa 24 Nzeri 2016 Perezida Nkurunziza abinyujije ku rukuta rwe rwa Twitter yamaganye ibikubiye mu cyegeranyo cya Loni.

Barigaragambya bamagana iyoherezwa ry'abahanga ba ONU baza gukora Ipereza
Baravuga ko nta Jenoside iri mu Burundi
Bari mu myigaragambyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza