Bimwe mu bihugu bigize EAC bikomeje kuba inzitizi mu gutanga imisanzu

Yanditswe na HABIMANA James
Kuya 24 Kamena 2019 saa 10:07
Yasuwe :
0 0

Umuryango wa Afurika y’Iburasirazuba (EAC) ushobora kujya ahantu habi nyuma ya gutangaza ingengo y’imari ingana na miliyoni 111.4 z’amadorali y’umwaka wa 2019/2020, mu gihe hari ibihugu biwugize n’ubu bitaratanga amafaranga byagombaga gushyira mu ngengo y’imari ishize.

Bimwe mu bikorwa by’inzego zigize uyu muryango ngo bishobora gusubira inyuma kuko ibihugu bimwe bidashaka kubahiriza ibyo byagombaga gutanga mu ngengo y’imari ya 2018/2019 yanganaga na miliyoni 99.7 z’amadorali.

Nubwo ibihugu bigize EAC bishyize imbere intego zirimo guhindura ubuzima bw’abaturage biciye mu guteza imbere inganda no guhanga imirimo, kuba bimwe muri ibi bihugu bitarimo kubahiriza ibyo byiyemeje mu ngengo y’imari bikomeje kuba imbogamizi.

Uyu muryango ugiye mu ngengo y’imari nshya mu gihe hari imishinga imwe ya ngombwa itarahabwa ingengo y’imari.

Muri Werurwe uyu mwaka ubwo Inteko Ishinga Amategeko ya EAC, yemezaga inyongera ya miliyoni 12 z’amadorali mu ngengo y’imari, ibihugu birimo u Burundi na Sudan y’Epfo byari bitaratanga umusanzu wabyo w’ingengo y’imari 2018/2019.

Ibi byatumye ubunyamabanga bw’uyu muryango bujya gushakira inkunga mu bafatanyabikorwa ngo bafashe iyi mishinga.

Ikinyamakuru The East African cyavuze ko inkunga itangwa n’abaterankunga nayo yagabanyutse kuko ufashe nko mu 2012, abaterankunga batangaga agera kuri miliyoni 124 z’amadorali mu gihe mu ngengo y’imari 2018/2019 yari miliyoni 43 z’amadorali gusa.

Minisitiri wungirije ushinzwe ibikorwa bya EAC muri Tanzania, Dr Damas Ndumbaro, yavuze ko ingengo y’imari y’uyu mwaka igamije gukomeza kwimakaza inzira ya politike ya EAC yo kwihuza.

Kugeza ubu kandi ngo uyu muryango ukomeje kuba agace gafashwa n’inkunga z’amahanga kuko ziri kuri miliyoni 54 z’amadorali.

Umudepite muri EALA Fatuma Ali Ibrahim, yavuze ko iyi ngengo y’imari ari nziza ariko ko kuba bimwe mu bihugu bitinda gutanga ibyo byiyemeje bibangamira imishinga y’uyu muryango.

Kugeza ubu ubunyamabanga bwa EAC nibwo buzahabwa amafaranga menshi ahwanye na miliyoni 53.2 z’amadorali, miliyoni 18.9 zihabwe EALA, miliyoni 4.2 ku Rukiko rwa EAC na miliyoni 9.5 ku nama ihuza za Kaminuza muri uyu muryango.

Bimwe mu bigomba kwibandwaho kandi harimo guteza imbere ihuzwa ry’imipaka no guteza imbere ubucuruzi hagati y’ibihugu bigize uyu muryango.

Gusa ngo kugeza ubu ubucuruzi hagati y’ibi bihugu buhagaze nabi kuko buri 20%, ugereranyije na 68% bukorwa mu bihugu bigize Umuryango w’Ubumwe bw’Ibihugu by’Iburayi na 48% mu bihugu bigize Umuryango w’Ibihugu byo mu Majyepfo ya Afurika (SADC).

Kuba ubucuruzi budatera imbere muri EAC ngo biraterwa n’ibibazo biri muri politike hagati y’ibi bihugu, no kuba bimwe mu bihugu bigishaka kurengera inganda zabyo byanga ko zihatana n’iz’ahandi.

Ibihugu birimo u Burundi bikomeje kudindiza imikorere ya EAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza