Kwamamaza

Bidasubirwaho u Burundi bwamenyesheje Loni ko buciye ukubiri na ICC

Yanditswe kuya 28-10-2016 saa 08:29' na Cyprien Niyomwungeri


U Burundi bwashyikirije Umuryango w’Abibumbye, Loni, ibaruwa iwumenyesha ko bwikuye mu Rukiko Mpuzamahanga Mpanabyaha, ICC, nyuma y’uko Inteko Ishinga Amategeko ibyemeje bidasubirwaho mu ntangiriro z’uku kwezi.

Ejo kuwa Kane nibwo Minisitiri w’Ubutabera mu Burundi, Aimee Laurentine Kanyana, ubwe yashyikirije Umunyamabanga Mukuru wa Loni, Ban-Ki Moon, ibaruwa yo kwivana muri ICC.

Iki cyemezo cy’u Burundi kije gikurikira icya Afurika y’Epfo nayo yamaze kumenyesha Loni ko yivanye muri ruriya rukiko rushinjwa kubogama rukibasira Afurika gusa, bitewe n’uko amaperereza rumaze gukora kuva muri 2002 ari ku Banyafurika.

Umuvugizi w’Umuryango w’Abibumbye, Stephane Dujarric, yahise asaba u Burundi na Afurika y’Epfo kwisubiraho kuri ibi byemezo.

Minisitiri w’Ububanyi n’Amahanga w’u Burundi, Alain Aimee Nyamitwe, yabwiye Ijwi rya Amerika ko badateze kwisubiraho ku cyemezo bafashe.

Ubusanzwe ingingo ya 127 y’amasezerano ya Roma ashyiraho urukiko rwa ICC, yemerera igihugu kinyamuryango kwivana muri ayo masezerano ku mpamvu zacyo bwite, kandi uko kwivanamo ntikubangamire ubundi bufatanye bushobora gukenerwa n’urukiko kuri icyo gihugu.

Igihugu cyemererwa kuva mu banyamuryango nyuma y’umwaka umwe kigejeje ku Munyamabanga Mukuru wa Loni ubusabe bwo kuvamo. Bisobanuye ko uhereye igihe ibaruwa yakiririwe bizafata umwaka umwe kugira ngo u Burundi bwemererwe guca ukubiri na ruriya rukiko.

U Burundi bwafashe iki cyemezo nyuma y’amezi atandatu gusa Umushinjacyaha Mukuru wa ICC, Fatou Bensouda, atangaje ko bagiye gukora iperereza ku byaha by’intambara byakorewe muri iki gihugu kuva muri Mata umwaka ushize ubwo Perezida Nkurunziza yatangazaga ko aziyamamariza manda ya Gatatu yaje no gutorerwa.

Umuryango uharanira uburenganzira bwa muntu Human Rights Watch, uvuga ko iki cyemezo kizagira ingaruka zikomeye cyane ku bantu bakorewe ibyaha muri ziriya mvururu. Uvuga ko gishobora kuba gifitanye isano n’uko abayobozi b’u Burundi batinya kugezwa imbere y’ubutabera kubera ibyaha byibasiye inyokomuntu bikomeje kubera muri kiriya gihugu.

Minisitiri w’Ubutabera mu Burundi, Aimee Laurentine Kanyana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved