00:00:00 IGIHE NETWORK KN KINYARWANDA EN ENGLISH FR FRANCAIS

BBC igiye gukomorerwa i Burundi

Yanditswe na Muhonzire Sylvine
Kuya 3 Nyakanga 2021 saa 01:34
Yasuwe :
0 0

Ikigo cy’igihugu gishinzwe itumanaho mu Burundi, NCC, cyatangaje ko kigiye gukomorera igitangazamakuru cy’Abongereza, BBC ndetse n’ikinyamakuru cya ‘Ikiriho’ byari bimaze imyaka itatu bihagaritswe mu Burundi bishinjwa kudakora kinyamwuga ndetse no guhonyora itegeko ryerekeranye n’itangazamakuru n’amahame ngengamyitwarire agenga uyu mwuga.

Mu kiganiro iki kigo giherutse kugirana n’abanyamakuru kuwa 16 Kamena 2021, Umuyobozi wacyo, Laurent Kagimbi, yabwiye abanyamakuru ko nta mbogamizi zigihari ku byerekeye itangazamakuru, bityo BBC ishobora gusaba kongera gukorera mu Burundi ikabyemererwa ndetse ko hakomeje ibiganiro byo gufungura ibindi bitangazamakuru.

Umuvugizi wa BBC yavuze ko yishimiye iki cyemezo leta y’u Burundi yafashe. Ati “Twishimiye aya makuru, twizeye ko hari ibigiye gukorwa mu gihe hagikomeje ibiganiro.”

Ibi byatumye abareberera hafi by’itangamakuru batangaza ko guverinoma y’u Burundi isa nk’iri kugerageza kubura umubano mwiza hagati yayo n’itangazamakuru. Gusa mu banyamakuru n’abasesenguzi baganiriye na VOA, batangaje ko nubwo ibi binyamakuru byakomorewe, hakiri amategeko aniga ubwisanzure bw’itangazamakuru muri iki gihugu.

Rachel Nicholson, umushakashatsi ukorera i Burundi mu muryango w’Abongereza urengera uburenganzira bwa muntu, Amnesty International, yavuze ko hakiri byinshi byo kwibazaho kuri ubu bwisanzure bw’itangazamakuru u Burundi buvuga ko bwatanze.

Yagize ati “Ikizabitwemeza ni uko ibitangazamakuru n’ibigo byigenga bizahabwa uburenganzira bwo gukorera mu Burundi byisanzuye kandi mu mahoro. Aho niho dugifite impungenge zikomeye.”

U Burundi bwatangaje ko buhagaritse BBC n’Ijwi rya Amerika, VOA, gukorera muri iki gihugu ku itariki ya 7 Mata 2018, mu gihe cy’amezi atandatu. Itegeko ryasohotse mbere y’ukwezi ngo iki gihugu gikore amatora yo guhindura itegeko nshinga.

Muri Werurwe 2019, iki gihugu cyongereye igihe cyo guhagarika ibi bitangazamakuru ndetse kinabuza abanyamakuru b’i Burundi kuvugana cyangwa gutanga amakuru kuri BBC na VOA.

Nubwo ariko iki gihugu cyatangaje ko BBC ishobora kongera gukora ntacyo cyavuze ku byerekeye gufungura kwa VOA ndetse n’iki gitangazamakuru kivuga ko cyasabye ibisobanuro kuri iyi ngingo ntigisubizwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .