Bamwe mu Banyafurika bakurikiranywe n’Urukiko Mpuzamahanga Mpanabyaha

Yanditswe na Evariste Nsengimana
Kuya 9 Ukwakira 2018 saa 05:03
Yasuwe :
0 0

Mu 1998 nibwo ibihugu 123 birimo 34 byo muri Afurika byasinye amasezerano ya Roma, ashyiraho Urukiko Mpuzamahanga Mpanabyaha (ICC), ruhabwa icyicaro i La Haye mu Buholandi.

Nyuma y’imyaka ine rwatangiye imirimo rufite intego yo gutanga ubutabera ku bantu bakoze ibyaha mpuzamahanga birimo iby’intambara, ibya Jenoside n’ibyibasira inyokomuntu.

Gusa hakunze kumvikana amajwi y’abarufata nk’isura nshya y’ubukoloni ku bihugu bya Afurika, barushinja kubibandaho nk’aho ari bo rwashyiriweho gusa.

Ibi byatumye hari ibihugu by’inkwakuzi byatangiye kwitandukanye narwo birimo u Burundi, Afurika y’Epfo, Gambia n’ibindi biri mu nzira. Gusa hari ibindi bikomeje kurutsimbararaho bishima imikorere yarwo.

Bamwe mu Banyafurika bagize aho bahurira na ICC

Laurent Gbagbo: Yabaye Perezida wa Côte d’Ivoire. Rwamushyize mu majwi mu 2011 rumushinja gukoresha ingabo mu bikorwa bibangamira uburenganzira bwa muntu nko gufata ku ngufu, kwica abasaga 3000 mu mvururu zakurikiye amatora mu 2010.

Uyu yatangiye kuburanishwa mu 2016.

Omar al-Bashir: Ni Perezida wa Sudan. ICC yamushyize mu majwi mu 2009, imushinja uruhare mu ntambara ya Darfur, yasize abasaga ibihumbi 400 bishwe abarenga miliyoni 2,5 bavanwa mu byabo, ingo zisaga 400 ziratwikwa.

Bashir ashinjwa ibyaha bya Jenoside, ibyibasiye inyoko muntu n’ibindi. Yashyiriweho impapuro zo kumuta muri yombi ariko ntibirakorwa.

Charles Taylor: Yabaye Perezida wa Liberia. Ashinjwa gufasha inyeshyamba mu ntambara zarwanye muri Sierra Leone hagati ya 1991 na 2002, yaguyemo abasaga ibihumbi 50.

ICC yahamuhamije ibyaha 11 birimo gufata ku ngufu, kwica, iterabwoba, kwinjiza abana mu gisirikare n’ibindi. Mu 2012 ahanishwa igifungo cy’imyaka 50. Afungiye mu Bwongereza.

Uhuru Kenyatta: Niwe Perezida wa Kenya. Yamushyize mu majwi ku byaha byibasiye inyoko muntu birimo gufata ku ngufu, kwica n’ibindi byakozwe mu mvururu zakuriye itorwa rye, zaguyemo abasaga 1200 abandi ibihumbi 600 barahunga.

Urubanza rwe rwatangiye kuburanishwa mu 2014 ariko ruza guhagarikwa mu 2015 kubera kubura ibimenyetso.

William Samoei Ruto: Ni visi Perezida wa Kenya. Yashyizwe mu majwi ku byaha bimwe n’ibishinjwa Kenyatta. Yatangiye kuburana mu 2013 ariko nawe ikirego kiza guhagarikwa mu 2016 habuze ibimenyetso.

Jean-Pierre Bemba: Yabaye Visi Perezida wa Repubulika Iharanira Demokarasi ya Congo, yashinjwe ibyaha byibasiye inyokomuntu byakorewe muri Centrafurika n’inyeshyamba yari ayoboye zo mu mutwe wa MLC.

Rwamukatiye igifungo cy’imyaka 18 ariko nyuma ruza kumugira umwere kubera amakosa yari yakozwe aburanishwa.

Yahamwe kandi n’icyaha cyo guha ruswa abatangabuhamya 14. Iki cyatumye akatirwa igifungo cy’amezi 12.

Muammar Gaddafi: Yabaye Perezida wa Libya. Uyu mugabo wapfiriye mu gitero yagabweho n’inyeshyamba, yashyiriwe impapuro zo kumuta muri yombi mu 2011, ku byaha birimo kwica n’igitugu byakozwe ari Perezida.

Abdel Raheem Muhammad Hussein: Yabaye Minisitiri w’Ingabo wa Sudan, ubu ni guverineri wa Khartoum. Yashyiriweho impapuro zo kumuta muri yombi mu 2012 ashinjwa ibyaha 20 birimo gufata ku ngufu, igitugu n’ibindi byibasiye inyokomuntu yakoze ingabo za Leta zihanganye n’umutwe w’aba-Janjaweed.

Charles Ble Goude: Yabaye Minisitiri w’urubyiriko muri Côte d’Ivoire, yari n’inshuti ya hafi ya Perezida Laurent Gbagbo.

Yafatiwe muri Ghana mu 2013, ashinjwa ibyaha byibasiye inyokomuntu birimo kwica, gufata ku ngufu, igitugu n’ibindi byakorewe mu mvururu zakurikiye amatora ya Perezida Gbagbo.

Hari abandi brimo nka Joseph Kony, uyobora umutwe w’inyeshyamba zo muri Uganda ‘Lord Resistance Army’ n’abandi bayobozi bawo bashakishwa ku byaha by’intambara n’ibyibasiye inyokomuntu.

Mu bihugu 11 ICC ifite abantu iri gukoraho iperereza, uretse Georgia iri hagati ya Europe na Aziya, ibindi byose ni ibyo muri Afurika.

Ibihugu icyenda ICC iri gukoramo iperereza ry’ibanze ni Afghanistan, Colombia, Guinea, Iraq, Nigeria, Palestine, Philippines, Ukraine na Venezuela.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza