Kwamamaza

AU yanze ibyo kunyuzwaho imishahara y’abasirikare b’u Burundi bari muri Somalia

Yanditswe kuya 13-11-2016 saa 17:40' na Rabbi Malo Umucunguzi


Umuryango wa Afurika yunze Ubumwe wanze kunyuzwaho imishahara y’abasirikare b’u Burundi bari mu butumwa bw’amahoro muri Somalia, AMISOM, nyuma y’igihe iyi mishara yishyurwa n’Umuryango w’Ubumwe bw’u Burayi, ubinyujije kuri konti ya Leta ariko nyuma ukabihagarika.

Uyu muryango ufite icyicaro mu Bubiligi, waje gufata umwanzuro wo kuyishyura, ariko uvuga ko amafaranga yawo adashobora kunyuzwa ku bategetsi b’u Burundi barimo abafatiwe ibihano banashinjwa kunyereza imitungo, ahubwo ko yacishwa mu Muryango wa Afurika yunze Ubumwe, AU, nayo ikayashyira kuri konti z’abo basirikare.

RFI yatangaje ko AU yanze ubusabe bw’uyu muryango, bitewe n’uko yanze gukurikiza icyemezo gishobora kugira ingaruka ‘‘ziremereye kandi mbi’’ ku mikorere ya AMISOM no ku mutekano muri Somalia muri rusange.

U Burundi bufite abasirikare bagera ku 5400 muri Somalia, bukaba ari ubwa kabiri bufite ingabo nyinshi muri AMISOM.

Umuryango w’Ubumwe bw’u Burayi niwo wari umuterankunga wa mbere w’u Burundi, aho inkunga yayo yanganaga na 20% by’ingengo y’imari y’igihugu.

Gusa nyuma yo kongera kwiyamamaza kwa Perezida Pierre Nkurunziza muri Mata 2015, umutekano mu gihugu warazambye, abantu 700 ubu bamaze kwicwa ndetse abasaga 800 baburiwe irengero, mu gihe abasaga ibihumbi 300 bamaze guhunga igihugu.

Muri Werurwe uyu mwaka, EU yahise ihagarika inkunga yageneraga ingabo z’u Burundi ziri muri Somalia inyuze mu ntoki za Leta, isaba AU kuyifasha kwishyura izo ngabo, imishahara itanyuze mu buyobozi bw’iki gihugu, ibintu uyu muryango wamaganiye kure.

Nyuma y’iminsi mike leta y’u Burundi yamaganye icyifuzo cy’uyu muryango, ivuga ko igihe bizaba bigenze bityo buzahita bukura ingabo zabwo muri Somalia.

Ibi bibazo byo guhagarikirwa inkunga, byatumye izi ngabo zimara amezi icyenda zidahembwa.

AU yateye utwatsi ibyo kunyuzwaho imishahara y'abasirikare b'u Burundi itangwa na EU

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved