AU yagaragaje uburyo ubukoloni bwatumye Abanyafurika bashidukira iby’i Burayi

Yanditswe na Habimana James
Kuya 5 Nyakanga 2019 saa 03:37
Yasuwe :
0 0

Umugabane wa Afurika ugizwe n’ibihugu 54 niwo uri inyuma mu gucuruzanya hagati yawo ku kigero cya 16%, mu gihe indi migabane yo yateje imbere ubucuruzi hagati y’ibihugu biyigize.

Aziya umugabane ugizwe n’ibihugu 48 ubucuruzi hagati yawo buri kuri 50%, umugabane w’u Burayi ugizwe n’ibihugu 44 wo ucuruzanya ku kigero cya 70%.

Umuryango wa Afurika Yunze Ubumwe watangaje ko impamvu nyamukuru yatumye ubucuruzi hagati y’Abanyafurika budatera imbere, byatewe n’uko ubwo Abakoloni bazaga muri Afurika bafashe ibihugu babaga barakoronije, bakabyumvisha ko bigomba kugura ibicuruzwa bivuye muri icyo gihugu.

Kugeza ubu ubucuruzi hagati y’Abanyafurika buri ku kigero kibi cyane, hari aho umunyafuruka ushaka kujya mu gihugu kimwe kuri uyu mugabane, usanga itike y’indege ihenze kurusha kuva muri icyo gihugu ujya ku wundi mugabane.

Ibihugu byinshi bya Afurika kandi ngo byiyumvisha ko aho kugura igicuruzwa cyakorewe muri Afurika, byahitamo kugura ibivuye i Burayi na Amerika niyo byaba bihenze.

Mu kiganiro Umuyobozi wa Komisiyo ishinzwe ubucuruzi n’inganda mu Muryango wa Afurika Yunze Ubumwe, Albert M.Muchanga yahaye Umunyamakuru ukora ikiganiro, This is America and The World gikorwa na Dennis Wholey, yavuze ko kuba abanyafurika barashyizeho isoko rimwe bijyanye no kuvanaho ibisigisigi by’Abakoloni basize kuri uyu mugabane.

Uyu munyamakuru yabajije Muchanga impamvu buri gihe iyo havuzwe ibihugu by’u Burengerazuba ku mugabane wa Afurika, abantu bavuga ko bije kujyana umutungo wa Afurika nk’amabuye y’agaciro.

Muchanga yavuze ko iyo urebye amateka y’ubukoloni ubona ko icyo bwari bushyize imbere byari ugushaka amasoko kuri uyu mugabane.

Yagize ati “Icyo babaga bashyize imbere ni uko ibihugu byakoronijwe byagombaga kuba n’abaguzi b’ibyo bihugu. Iyi ni nayo mpamvu usanga ubucuruzi hagati y’abanyafurika ari buke, urugero nk’abakoronijwe n’Abongereza bagombaga kubona ibicuruzwa bivuye mu Bwongereza, ni nako byari bimeze ku bihugu byakoronejwe n’u Bufaransa.”

Yakomeje agira ai “Nk’Abanyafurika biciye muri iri soko rusange turashaka kongera ubucuruzi hagati yacu. Kuva mu gihe cy’u bukoloni Afurika wakomeje kuba umugabane wo kujyanamo ibicuruzwa gusa, ibikorwa remezo byubatswe byari ibyo gufasha gusa kuzana bya bicuruzwa bivuye mu bihugu by’Abakoloni ibi byatumye ubukungu bwa Afurika butandukana, nta gaciro kigeze gahabwa ibihakorerwa.”

Tariki ya 7 Nyakanga uyu mwaka uzaba umunsi w’amateka ku mugabane wa Afurika, kuko aribwo abakuru b’ibihugu na za guverinoma ku mugabane wa Afurika, bazatangiza ku mugaragaro isoko rusange ry’ibi bihugu, AfCFTA i Niamey muri Niger.

Muchanga yavuze ko kubera kubona ibi bibazo byose kuri uyu mugabane, 2012 nibwo ibihugu bya Afurika byatangiye kuganira uko byashyiraho iri soko rusange, aya masezerano atangazwa mu 2015 muri Afurika y’Epfo ariko aba bayobozi biha imyaka ibiri yo kuba barangije kuyumvikanaho. Mu 2018 nibwo abakuru b’ibihugu bemeranyijwe ko basinyana aya masezerano, asinyirwa i Kigali.

Yagize ati “Kugira ngo dushyireho isoko rimwe rihuriweho bizafasha ko ibicuruzwa bigenda ku mugabane wose nta nkomyi bityo abaturage nabo bahabonere amahirwe.”

Yakomeje agira ati “Tugiye gushyiraho ibikorwa remezo bihuza ibihugu ku buryo bizafasha ubu bucuruzi. Hazavugururwa inzira z’amazi, iz’ikirere, imihanda ya gari ya moshi n’ibindi kandi ibi byose bizakorwa hagati ya za leta ndetse n’abikorera bo kuri uyu mugabane.”

Muchanga yavuze ko tariki 7 Nyakanga abakuru b’ibihugu ari bwo bazemeza neza igihe ubu bucuruzi buzatangira, byaba mu mezi atandatu ari mbere cyangwa umwaka.

Kuba hari ibihugu bimwe bitarashyira umukono kuri aya masezerano, Muchanga yabwiye uyu munyamakuru ko na bike bisigaye hari icyizere ko bizasinya vuba.

Inyigo iheruka y’Ishyirahamwe Mpuzamahanga ry’Ubwikorezi bw’Indege (IATA) yerekanye ko guhuza isoko byatuma ibihugu bya Afurika byongera miliyari 1.3 z’amadolari ku musaruro mbumbe y’uwo mugabane, bigahanga imirimo 155 000, hakazigamwa miliyoni 500 z’amadolari ava ku matike y’indege, kongera serivisi ku kigero cya 75%, kongera urwego rw’ubucuruzi no kugabanya igihe abagenzi bakoreshaga mu ngendo.

Umuyobozi wa Komisiyo ishinzwe ubucuruzi n’inganda mu Muryango wa Afurika Yunze Ubumwe, Albert M.Muchanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza