Amerika yongeye gushyira igitutu kuri Leta ya Congo

Yanditswe na Ishimwe Israel
Kuya 24 Ugushyingo 2016 saa 06:54
Yasuwe :
0 0

Leta Zunze Ubumwe za Amerika zasabye ubutegetsi bwa Repubulika Iharanira Demokarasi ya Congo gukurikiza icyifuzo cy’Inama Nkuru y’Abepisikopi Gatolika (Cenco), cy’uko habaho ibindi biganiro by’amahoro byagutse hagati ya Leta n’abatavuga rumwe na yo, hagira ubitambamira na we agahita afatirwa ibihano ku rwego mpuzamahanga.

Jeune Afrique dukesha iyi nkuru itangaza ko CENCO imaze igihe ihihibikanira gushaka uburyo Leta n’abatavuga rumwe n’ubutegetsi bari inyuma ya Etienne Tshisekedi na Moïse Katumbi, bahurira mu biganiro byagutse, hagamijwe gushaka imyanzuro y’amahoro, dore ko iyo kuwa 18 Ukwakira yarebaga bamwe mu batavuga rumwe na Leta.

Mu itangazo ryashyizwe ahagaragara kuwa 22 Ugushyingo, John Kirby, Umuvugizi w’Umunyamabanga wa Leta muri Amerika, John Kerry, yavuze ko iki gihugu kigiye gutanga inkunga mu biganiro bigamije ko hategurwa amatora yizewe kandi ku gihe cyateganyijwe.

Ati “Tuzanye umusanzu wacu mu biganiro bizayoborwa na Cenco, bigahuza Guverinoma ya Congo n’uruhande rw’abatavuga rumwe na yo, hagamijwe ko haboneka imyanzuro iganisha ku matora aciye mu mucyo kandi akabera igihe cyateganyijwe.”

Hagendewe ku myanzuro y’ibiganiro byahuje Leta ya Congo n’igice kimwe cy’abatavuga rumwe na yo, amatora y’umukuru w’igihugu azaba muri Mata 2018.

Kugeza icyo gihe, ni Perezida Kabila uzaba ukiri ku butegetsi n’ubwo manda ye ya kabiri yemererwa n’Itegeko Nshinga izarangira kuwa 19 Ukuboza uyu mwaka. Azaba afatanyije na Minisitiri w’Intebe wo ku ruhande rw’abatavuga rumwe n’ubutegetsi ariko witabiriye ibiganiro by’amahoro byasojwe kuwa 18 Ukwakira uyu mwaka.

Icyakora ibyo byamaganiwe kure n’Ihuriro ry’abatavuga rumwe n’ubutegetsi, rivuga ko hakwiye gushyirwaho ubutegetsi bw’inzibacyuho ubwo manda ya Kabila izaba irangiye, bukaba ari bwo butegura amatora adakwiye kurenza 2017 atabaye, ibyo bikaba bisa n’aho ari na byo bishyigikiwe na Leta Zunze Ubumwe za Amerika.

John Kirby akomeza agira ati “Turasaba dukomeje, ko Leta ya Congo n’abatavuga rumwe na yo bakorana na Cenco bagakemura ibibazo byose biriho, birimo iby’ingengabihe y’amatora yo mu 2017, bakanakuraho impungenge z’uko Perezida Kabila yakongera gutegeka indi manda, kandi Itegeko Nshinga ntirihindurwe, ndetse Komisiyo y’amatora ikabona ubwigenge busesuye, hagashyirwaho Guverinoma ihuriweho n’impande zombi, hakanashyirwaho Komite Ngenzuzi yigenga.”

Icyakora yanasabye uruhande rw’abatavuga rumwe n’ubutegetsi cyane Ihuriro ry’abayoboke ba Étienne Tshisekedi na Moïse Katumbi, gutanga ibitekerezo byubaka bakirinda amagambo agamije gusenya no gukora ibindi bikorwa binyuranyije n’ibyo Demokarasi iteganya.

Amerika ishobora gushyiraho ibihano kuri bamwe mu bambari ba Perezida Kabila

Kuwa 15 Ukwakira, Inteko Ishinga Amategeko ya Amerika yafashe imyanzuro iteganyiriza ibihano bamwe mu bayobozi bakuru ba Congo.

Muri iyo myanzuro ikirimo gukorerwa ubugororangingo muri Sena ya Amerika, hari aho bagira bati “Leta Zunze Ubumwe za Amerika zigomba gufatira ibihano bamwe mu bo mu butegetsi bazatambamira inzira iganisha ku nzibacyuho yuje umutuzo, izatuma habaho amatora mu mucyo, hubahirijwe ibyifuzo by’abaturage.”

Nyuma y’aho USA ifatiye ibihano abasirikare bakuru babiri barimo na Gen. Amissi Tango Four, ibihano bitaha birareba cyane abambari ba Perezida Kabila, bazakora ibikorwa bigamije gutambamira inzira ya Demokarasi. Nta zina ryigeze ritangazwa mu bashobora gufatirwa ibyo bihano birimo guhagarikirwa ingendo mu mahanga no gufatira imitungo yabo.

Icyo gitekerezo cyo gufatira ibihano abo banye-Congo cyazanywe na Chris Smith na Ed Royce bo mu ishyaka ry’aba-Républicains, hamwe na bagenzi babo Karen Bass na Eliot Engel bo mu ishyaka ry’aba-Démocrates, banasabye ko hakongera gusuzumwa inkunga mu bukungu no mu by’umutekano, Amerika igenera Congo, ku buryo zishobora guhagarara kugeza ubwo ibibazo bya Politiki bizaba birangiye, hagasigaraho gusa inkunga zo mu by’ubuzima.

Muri iyo myanzuro y’Inteko Ishinga Amategeko kandi, basaba ko Perezida Kabila yavugira ku karubanda ko ashingiye ku biteganywa n’Itegeko Nshinga rya Repubulika Iharanira Demokarasi ya Congo, atazaguma ku butegetsi nyuma y’itariki ya 19 Ukuboza ubwo manda ye ya kabiri izaba irangiye.

Perezida Kabila n'abambari be bashobora gufatirwa ibihano na Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza