Amerika yohereje abaganga mu kurwanya Ebola ku mupaka w’u Rwanda na RDC

Yanditswe na Evariste Nsengimana
Kuya 3 Kanama 2019 saa 10:33
Yasuwe :
0 0

Ikigo gishinzwe kugenzura no gukumira indwara cyo muri Leta zzunze ubumwe za Amerika (CDC), cyatangaje ko cyohereje abaganga 12 muri Repubulika iharanira Demokarasi ya Congo (RDC) bazatanga ubufasha ku cyorezo cya Ebola ku mupaka wa Goma, uyihuza n’u Rwanda.

Guhera umwaka ushize kugera ku wa kane Ebola yari imaze kwica abasaga 1800 muri RDC, barimo batatu bagaragaye i Goma. CDC ivuga ko mu gihe yamenyeshwa ko inyeshyamba zo mu Majyaruguru ashyira Uburasirazuba bwa Congo zatanze agahenge, yazoherezayo abaganga benshi.

Umuyobozi wa CDC, Dr Robert R. Redfield, yatangarije kuri Twitter ko imyeshyamba zibangamira abaganga bagiye gutanga ubufasha ku buryo bishobora gutuma Ebola irushaho gukwirakwira.

Umuyobozi ushinzwe gukumira indwara zandura muri CDC, Henry Walke, yavuze ko umubare w’abaganga boherezwayo ushobora kwiyongera mu gihe byagaragara ko umutekano umeze neza nk’uko byatangajwe n’Ijwi rya America.

Iki kigo cyasobanuye ko kiri gukorana n’Ikigo cya Leta Zunze Ubumwe za Amerika gishinzwe ububanyi n’amahanga ku kugenzura uko umutekano wifashe ku buryo no mu duce dukikije Umujyi wa Goma hakoherezwa abaganga batanga ubufasha ku cyorezo cya Ebola.

CDC itangaje ibi mu gihe u Rwanda rwakajije ingamba zo kugenzura abinjira mu Rwanda bavuye muri RDC ku buryo batakwirakwiza Ebola mu baturage barwo, runabagira inama yo kwirinda kujya mu duce icyo cyorezo cyagaragayemo.

Umuvugizi w’Ishami ry’Umuryango w’Abibumbye ryita ku Buzima, Dr. Margaret Harris, yavuze ko ari ingenzi ko abantu bafite ibyago byo kwandura Ebola bahabwa urukingo ariko usanga hari hari abihisha banga ko babashyira mu bafite ibyago byo guhura na Ebola, batekereza ko kujyanwa mu kigo gitanga ubufasha kuri Ebola ari ukwegerezwa urupfu.

Kuva umwaka ushize Ebola yongeye kwaduka muri RDC ku nshuro ya 10, abantu basaga 2600 nibo bivugwa ko yagaragayeho yicamo abasaga 70%.

Indwara ya Ebola ikomeje kwibasira uburasirazuba bwa RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza