Amerika yirukanye umudiplomate wa Uganda ushinjwa gukubita umugore we

Yanditswe na Evariste Nsengimana
Kuya 13 Mutarama 2018 saa 01:02
Yasuwe :
0 0

Uganda yacyuye Dickson Ogwang wari wungirije ambasaderi wayo muri Leta Zunze Ubumwe za Amerika, nyuma y’uko iki gihugu kimwirukanye azira gukubita umugore we.

Ogwang yirukanwe muri Amerika kubera ko yashatse gukoresha ubudahangarwa ahabwa no kuba ari intumwa y’igihugu cye, kugira ngo atagezwa imbere y’ubutabera.

Ogwang yakubise umugore we nyuma y’ibirori byo gushima Imana byari byabereye mu rugo rwe, mu batumiwe hakazamo n’umukobwa bivugwa ko ari ihabara rye, undi agatangira kumwaka ibisobanuro.

Uwahaye amakuru Daily Monitor yavuze ko aho kumusubiza yategereje ko abashyitsi bataha atangira kumukubita ndetse amukomeretsa ku izuru. Bake mu batumirwa bari basigaye batabaje polisi, umugore wa Ogwang ahita yihutanwa kwa muganga.

Ati “Ubwo ibi byagezwaga kuri polisi, cyahise kiba ikibazo gishingiye kuri dipolomasi, kubera ko abayobozi muri Leta ya Washington bashakaga ko Ogwang agezwa imbere y’urukiko.”

Ibyo kwirukanwa kwa Ogwang byemejwe n’Umunyamabanga wa Leta muri Minisiteri y’Ububanyi n’Amahanga muri Uganda, Okello Oryem, wavuze ko ibyabaye bibabaje, kandi igihe azaba amaze kugera mu gihugu we n’umugore we bazagirwa inama ku buryo bitazasubira.

Ati “Umwe mu bakozi bacu yagize ikibazo mu rugo rwe cyatumye asabwa kuva muri kiriya gihugu. N’ibintu biteye isoni, kandi twebwe hano muri Minisiteri y’Ububanyi n’Amahanga ntitubihakana.”

Okello ariko yahakanye amakuru yavugaga ko uriya mudiplomate yasabwe kuva muri Amerika, nyuma y’uko polisi igiye kumufata iwe mu rugo.

Dickson Ogwang yirukanywe muri Amerika azira gukubita umugore we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza