Amerika yasabye Loni gushyiriraho Sudani y’Epfo ibihano

Yanditswe na Ishimwe Israel
Kuya 18 Ugushyingo 2016 saa 03:10
Yasuwe : XX
136 71

Leta Zunze Ubumwe za Amerika zatangaje ko ziteguye guhagarika inkunga y’intwaro zageneraga Sudani y’Epfo mu rwego rwo gucogoza imvururu zimaze imyaka itatu zishyamiranyije Leta n’abatavuga rumwe zahitanye abasivili benshi.

Ibi bije nyuma y’urugendo, Umujyanama wa Loni ku bijyanye no kwirinda Jenoside, Adama Dieng, aherutse kugirira muri iki gihugu mu cyumweru gishize agatangaza ko hashobora kuvuka Jenoside mu gihe impande zombi ziticaye ngo zicoce ibibazo.

Ubusabe bwa Leta Zunze Ubumwe za Amerika buhuriranye gushobora gutuma ubucuruzi bw’intwaro zoherezwaga muri Sudani y’Epfo buhagarikwa, ndetse n’impapuro z’inzira z’abakekwaho kugira uruhare mu bwicanyi n’imitungo yabo iri mu mahanga bigafatirwa.

Ku mugoroba wo kuri uyu wa Kane, tariki ya 17 Ugushyingo 2016, nibwo Amerika yashyikirije Akanama ka Loni gashinzwe Amahoro n’Umutekano ku Isi inyandiko isaba ko Sudani y’Epfo ifatirwa ibihano.

Ntabwo igihe ibi bihano bizatangira gushyirirwa mu bikorwa kiramenyekana, ndetse harakibazwa niba Perezida Salva Kiir n’uyoboye uruhande rw’abatavuga rumwe na Leta Riek Machar wahoze ari Visi Perezida ndetse n’abayobozi bakuru mu ngabo bizabageraho.

Ambasaderi wa Leta Zunze Ubumwe za Amerika muri Loni, Samantha Power, yatangaje ko ubutegetsi bwa Obama bwananiwe kwihanganira uguhangana kw’abayobozi ba Sudani y’Epfo. Yabashinje kudahereza ubwisanzure ingabo ziri kubungabunga ubutumwa bw’amahoro ndetse no kohereza inyandiko zirimo ibinyoma ku biro bikuru bya Loni.

Yatangarije Akanama ka Loni ati “Na n’ubu twicaye aha ubu amasasu ari kwisuka muri iki gihugu. Ntabwo tugomba gutuza ngo ibintu bikomeze kudogera tubirebera.”

Imiryango irengera uburenganzira bw’ikiremwamuntu yakunze gusaba ko Sudani y’Epfo yafatirwa ibihano, ndetse n’intwaro zihacuruzwa zigahagarikwa, ariko ku ikubitiro Leta Zunze Ubumwe za Amerika ntiyashakaga kubishyuira mu bikorwa.

Intumwa ya Leta ya Sudani y’Epfo muri Loni, Joseph Malok, yabwiye abagize ako kanama ko kwima Leta uburenganzira bwo gucunga imbibi z’igihugu ku nyungu z’abaturage ari ukutubahiriza ubwigenge bw’igihugu.

Muri 2015, Akanama ka Loni gashinzwe Amahoro n’Umutekano kafatiye ibihano abayobozi bakuru muri Sudani y’Epfo barimo aba-Jenerali batandatu, batatu bo kuri buri ruhande mu zihanganye. Ibyo bihano birimo kubirukana mu kazi ndetse no gufatira impapuro zabo z’inzira.

Ambasaderi wa Leta Zunze Ubumwe za Amerika muri Loni, Samantha Power

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE