00:00:00 IGIHE NETWORK KN KINYARWANDA EN ENGLISH FR FRANCAIS

Amerika yasabye abarwanyi bo muri Tigray kuva mu bice bakajijemo imirwano vuba na bwangu

Yanditswe na Dufitumukiza Salathiel
Kuya 31 Ukwakira 2021 saa 08:44
Yasuwe :
0 0

Leta Zunze Ubumwe za Amerika zasabye abarwanyi ba TPLF bo mu Ntara ya Tigray kuva mu bice by’Amajyaruguru ya Ethiopie bamaze iminsi bavuga ko bigabije ndetse imirwano yaho ikaba yafashe indi ntera.

Ibiro Ntaramakuru by’Abafaransa dukesha iyi nkuru, AFP byatangaje ko ku wa Gatandatu tariki 30 Ukwakira 2021, abo barwanyi bavuze ko bigaruriye Umujyi wa Dessie uri mu gace ka Amhara mu Majyaruguru ya Ethiopie. Icyakora Guverinoma y’icyo gihugu yabyamaganiye kure ibyita ibinyoma na bamwe mu bahatuye bavuga ko barinzwe n’ingabo za Leta.

Ku rundi ruhande, mu bice bihanye imbibi na Tigray itumanaho ryarahagaritswe kandi n’abanyamakuru ntibabasha kuhagera, ibituma ubwoba buba bwinshi ko intambara iri kuhabera ishobora kuba ikomeye.

Mu itangazo Minisiteri y’Ububanyi n’Amahanga ya Amerika yasohoye yasabye abarwanyi ba TPLF “kuva mu Mijyi ya Dessie na Kombolcha vuba na bwangu.”

Riti “Turasaba TPLF kudakoresha intwaro ziremereye mu Mijyi kandi twongeye kwamagana igitero cy’indege muri Mekelle n’ibindi bice bya Tigray bihitana ubuzima bw’abatabarika.”

Icyo gitero cyagabwe muri uku kwezi hagati, gihitana abantu umunani barimo umugore utwite. Uruganda rukora ibikoresho by’ubwubatsi, Mesfin Industrial Engineering PLC, rwarangijwe ndetse hashya inzu ebyiri z’ububiko bw’amapine.

Umuvugizi wa Leta Zunze Ubumwe za Amerika, Ned Price, yavuze ko nta gisubizo cyo guhosha ayo makimbirane amaze umwaka cyaturuka mu nzira za gisirikare.

Ati “Impande zose zigomba gutangira ibiganiro bigamije gushyira intwaro hasi nta bindi bibanje gusabwa.”

Ababarirwa mu bihumbi bamaze kuva mu byabo abandi basize ubuzima muri iryo hangana ryatangijwe n’icyo Minisitiri w’Intebe wa Ethiopie, Dr Abiy Ahmed,yise “agasuzuguro” ngo kuko Intara ya Tigray yari yigometse ku butegetsi bwe.

Ingabo ze zabanje kwigarurira ako gace ariko bigeze muri Kamena 2021, abarwanyi ba TPLF bazikubita inshuro bisubiza Tigray yabo ndetse bakomereza imirwano mu bice by’Amajyaruguru y’icyo gihugu bihanye imbibi nayo.

Imiryango Mpuzamahanga iratabariza abaturage bo muri ibyo bice ko bugarijwe n’inzara kuko ubufasha butabasha kubageraho uko bikwiye.

Amerika yasabye abarwanyi bo muri Tigray kuva mu bice bakajijemo imirwano vuba na bwangu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .