00:00:00 IGIHE NETWORK KN KINYARWANDA EN ENGLISH FR FRANCAIS

Amerika yahagaritse imikoranire na Sosiyete yakoze Pegasus u Rwanda rwashinjwe

Yanditswe na Umwali Zhuri
Kuya 4 Ugushyingo 2021 saa 07:52
Yasuwe :
0 0

NSO Group, Sosiyete y’Ikoranabuhanga yo muri Israel, yahagaritswe muri Leta Zunze Ubumwe za Amerika aho iri ku rutonde rw’izitemewe gukorerayo ubucuruzi.

Iyi sosiyete ni yo yakoze Porogaramu ya Pegasus yifashishwa mu bikorwa by’ubutasi. U Rwanda ni kimwe mu bihugu byashinjwe ko biyikoresha gusa rwabihakanye inshuro nyinshi rwivuye inyuma.

Bivugwa ko Pegasus ikoreshwa n’ibihugu mu kuneka abo bitavuga rumwe, abanyamakuru, abanyapolitiki n’abandi.

Amerika yatangaje ko NSO Group, yashyizwe kuri lisiti y’ibigo bitemewe gukorana ubucuruzi nayo.

NSO Group yatangaje ko itanyuzwe n’umwanzuro wafashwe na Amerika, ivuga ko mu bihe bitandukanye ikoranabuhanga ryayo ryagiye rifasha umutekano wa Amerika mu kurwanya iterabwoba n’ibindi byaha.

Iyi sosiyete yongeye gushimangira ko porogaramu yayo icuruzwa ku nzego z’igisirikare, ku bigo bishinzwe kubahiriza amategeko n’inzego z’iperereza zo mu bihugu ku nyungu z’imibereho myiza y’abaturage.

Iri koranabuhanga bivugwa ko iyo rihujwe na nimero y’umuntu runaka, rihita ryibasira telefoni ye binyuze kuri WhatsApp n’izindi mbuga nkoranyambaga cyangwa se mu gisa na “missed calls”.

Rishobora guha urikoresha password za nyiri telefoni, rikamufasha gusoma ubutumwa bwe no kumva ibyo avugana n’abandi.

Ikindi ni uko rishobora kwifashisha GPS rikerekana aho nyiri telefoni ari. Bivugwa ko rishobora kubona amakuru yo kuri telefoni z’ubwoko ubundi bizwi ko bwizewe ku mutekano nka iPhone cyangwa zikareba n’ubutumwa bwo kuri application zizwiho kuba zizewe kurusha izindi nka Signal.

Ku muntu ufite telefoni ikoresha camera, iri koranabuhanga rishobora gutuma yifungura ku buryo umuntu uri kurikoresha ashobora kubona amashusho y’aho nyirayo ari.

Pegasus igurishwa igihugu cyangwa imiryango itegamiye kuri leta. Mu kuyikoresha hagurwa uburenganzira (license). Bivugwa ko igiciro kizwi n’umuguzi n’ugurisha, gusa ngo license imwe ishobora kugura miliyoni 100 Frw.

Mu 2016, byavugwaga ko NSO Group yishyuzaga ibihumbi 650 $ [asaga miliyoni 650 Frw] kuri telefoni cyangwa se mudasobwa 10. Gusa mbere habanza kwishyurwa ibihumbi 500 $ (miliyoni zirenga 500 Frw) yo gushyira (installation) iyo porogaramu muri mudasobwa.

Amerika yahagaritse imikoranire na NSO Group yakoze Pegasus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .