Amerika yafatiye ibihano abayobozi ba Tanzania babangamiye amatora

Yanditswe na Muhonzire Sylvine
Kuya 20 Mutarama 2021 saa 12:11
Yasuwe :
0 0

Leta Zunze Ubumwe za Amerika zafatiye bamwe mu bayobozi ba Tanzania ibihano birimo kwimwa viza, kubera amakosa bakoze arimo kubangamira amatora ya Perezida aherutse.

Umunyamabanga wa Leta ushinzwe ububanyi n’amahanga, Mike Pompeo, yatangaje ko abayobozi bagize uruhare mu kubangamira ihame rya demokarasi muri icyo gihugu batazemererwa kwinjira muri Amerika.

Bivugwa ko amatora yabaye mu Ukwakira umwaka ushize muri Tanzania yaranzwe no kubangamira abatavuga rumwe n’ubutegetsi. Ubutegetsi kandi bushinjwa kwiba amajwi mu matora. Amerika ikaba ivuga ko ayo matora atabaye mu bwisanzure nkuko The East African yabitangaje.

Abashinzwe uburenganzira bwa muntu bavuga ko nibura abayobozi 150 b’amashyaka atavuga rumwe na leta bafunzwe mu gihe cy’amatora.

Perezida John Pombe Magufuli niwe watsindiye manda ya kabiri muri ayo matora kuko yagize 84.39%.

Aya matora yakemanzwe cyane n’ibihugu byo mu burengerazuba bw’isi, biza guhumira ku murari noneho ubwo umwe mu bari bahanganye na Magufuli, witwa Tundu Lissu, atotejwe bikomeye n’ubuyobozi bwa Tanzania, ibintu byatumye nyuma y’amatora ahungira mu gihugu cy’u Bubiligi kugira ngo akize amagara ye.

Ntabwo Amerika yigeze itangaza amazina y’abayobozi bafatiwe ibihano. Kugeza ubu ubuyobozi bwa Tanzania ntacyo buravuga kuri ibyo bihano bamwe mu bayobozi bafatiwe.

Amatora ya Tanzanie aherutse yavuzwemo uburiganya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .