Amategeko ya Tanzania agiye gukurwa mu Cyongereza ashyirwe mu Giswahili

Yanditswe na Dufitumukiza Salathiel
Kuya 12 Gashyantare 2021 saa 02:28
Yasuwe :
0 0

Leta ya Tanzaniya yashyikirije Inteko ishinga Amategeko umushinga w’itegeko ryo guhindura amategeko yose n’ibikorwa bijyanye n’ubutabera bigakurwa mu Cyongereza bigashyirwa mu Giswahili, kuko ari rwo rurimi gakondo rukoreshwa mu butegetsi ndetse akaba ari na rwo rubanda nyamwinshi bashobora kumva bakanavuga.

Kuwa 11 Gashyantare 2021 nibwo uwo mushinga washyikirijwe Akanama k’intumwa za rubanda gashinzwe Itegeko Nshinga, kugira ngo kawusesengure.

Umuvugizi w’Inteko y’icyo gihugu, Stephen Kagaigai, yatangaje ko uwo mushinga wamaze gushyirwa ahagaragara kugira ngo rubanda bamenye ibiwukubiyemo byose ndetse bawutangeho ibitekerezo byabo; hanyuma akanama gashinzwe Itegeko Nshinga n’ibijyanye n’amategeko muri rusange kazaterane kiga kuri ibyo bitekerezo kabihuze n’uwo mushinga.

Byitezwe ko kuvana amategeko yose na gahunda z’ubutabera mu Cyongereza bigashyirwa mu Giswahili bizagira uruhare rukomeye mu gutanga ubutabera ku Banya-Tanzania, kuko bazaba babasha kumva neza uburenganzira bwabo n’ibyo bemererwa n’amategeko bityo ntibabe barenganywa, dore ko n’imanza zizacibwa mu rurimi bumva.

Bizabafasha kandi kurushaho gusobanukirwa ingingo z’amategeko n’imikorere y’inkiko n’izindi nzego z’ubutabera, cyane ko amategeko yose azajya atorwa kandi akanandikwa mu Giswahili mbere, aho kuba mu Cyongereza nk’uko byari bimeze.

Uwo mushinga washyikirijwe Inteko nyuma y’uko mu ntangiriro z’uku kwezi Perezida w’icyo gihugu, John Pombe Magufuli, yari yasabye Minisiteri y’Ubutabera n’ishinzwe kurinda Itegeko Nshinga gushaka uko amategeko n’amabwiriza byose byashyirwa mu Giswahili; kuko ururimi bamaze imyaka isaga 60 bakoresha ari urw’abakoloni kandi rukaba rutumvwa n’abenegihugu bose.

Tanzania imaze igihe ishyira imbere ikoreshwa ry’Igiswahili nk’ururimi gakondo ahantu henshi, kuko no mu burezi byagejejwemo. Ibitabo byinshi bikoreshwa mu mashuri byandikwa muri urwo rurimi, ndetse rwemejwe nk’urw’ibanze rwo kwigishamo nk’uko mu Rwanda hemejwe kwigisha mu Cyongereza.

Inzego z’ubuyobozi zasabwe kurukoresha kenshi mu mbwirwaruhame no gutanga serivisi, ndetse na Perezida ubwe ni rwo inshuro nyinshi atangamo imbwirwaruhame ze.

Guhindura amategeko ya Tanzania mu Giswahili bizafasha abaturage gusobanukirwa inzira z'ubutabera bw'icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .