Kwamamaza

Amakenga ku noti nshya zashyizwe ku isoko muri Zimbabwe

Yanditswe kuya 29-11-2016 saa 09:00' na Hagengimana Philbert


Nyuma y’imyaka irindwi idolari rya Zimbabwe rikuwe ku isoko kubera gutakaza agaciro bikabije, muri icyo gihugu hashyizweho irindi faranga rifite agaciro k’idolari rya Amerika, gusa amakenga ni yose ku bibaza ko rishobora kuzababera nk’iryo bahoranye.

Iyo noti yashyizwe ahagaragara kuri uyu wa Mbere tariki ya 28 Ugushyingo, yiswe "billets d’obligation", ikaba isimbuye idolari rya Amerika na Rand ryo muri Afurika y’Epfo, yari asanzwe akoreshwa muri Zimbabwe kuva mu 2009 ubwo hari hakuweho idolari ry’icyo gihugu ryari rimaze guta agaciro.

Banki Nkuru y’Igihugu muri Zimbabwe yahaye aya mafaranga mashya agaciro kangana n’idolari ryo muri Amerika.

BBC dukesha iyi nkuru ivuga ko ubutegetsi bwa Zimbabwe bwafashe icyemezo cyo gushyiraho umubare ntarengwa w’inoti zizajya zisohoka, kugira ngo zitazaba nyinshi ku isoko bikaba byatera ibindi bibazo.

Ku ikubitiro, miliyoni 10 z’Amadolari ya Amerika zigizwe n’inoti z’amadolari abiri n’iz’atanu, ni yo yashyizwe mu baturage gusa.

Abacuruzi bo bashimye icyo gikorwa, bavuga ko nibura bizatuma ubukungu bwabo buzahuka, ariko abatavuga rumwe n’ubutegetsi, abakozi n’abo mu miryango itari iya Leta ntibabikozwa, ndetse ngo barategura gukora indi myigaragambyo muri iki cyumweru, dore ko banatangiye kuryamagana hagitangazwa umugambi wo kurishyira ku isoko.

Mbere y’uko izo noti nshya zishyirwa ku isoko, Abanya-Zimbabwe babanje gukura amafaranga yabo muri banki, batinya ko iyo noti nshya ishobora kuza itanganya agaciro n’ayo bari basanzwe bakoresha.

Mu mwaka wa 2008, igi ryaguraga miliyari 50 z’amadorali akoreshwa muri Zimbabwe, ari na cyo giciro cyari icy’umugati, ayo mafaranga akaba yarashoboraga kugura imodoka 12 mu myaka 10 yabanje (ni ukuvuga mu 1998).

Ubwo idolari rya Zimbabwe ryakurwaga ku isoko mu 2009, ryari ryaratakaje agaciro ku kigero cya 231,000,000 % ariko ntibyabujije abatavuga rumwe n’ubutegetsi bwa Robert Mugabe kwigaragambya bamagana ikorwa ry’ifaranga rishya muri icyo gihugu.

Zimbabwe yashyizeho ifaranga ringanya agaciro n'idorali rya Amerika

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved