Afurika y’Epfo yatangiye urugendo rwo kwivana muri ICC

Yanditswe na Uwishyaka Jean Louis
Kuya 22 Ukwakira 2016 saa 07:01
Yasuwe :
0 0

Nyuma y’umwaka itangaje ko izava mu Urukiko Mpuzamahanga Mpanabyaha (ICC), Leta ya Afurika y’Epfo yamenyesheje Umuryango w’Abibumbye ko igiye gutangira gutegura ibijyanye no gusesa amasezerano ya Roma ashyiraho uru rukiko.

Mu ibaruwa Ministiri w’Ububanyi n’Amahanga, Maite Nkoana-Mashabane yandikiye Loni yavuze ko kuba Afurika y’Epfo ibarizwa muri uru rukiko bituma itabasha kurinda ubusugire bw’abashyitsi basura igihugu.

Jeune Afrique dukesha iyi nkuru ivuga ko kwivana muri ICC kwa Afurika y’Epfo bishobora kuzabaho nyuma y’umwaka Loni ibimenyeshejwe.

Iki gihugu cyakunze kwijundika uru rukiko, ariko ubuheruka ni muri Kamena 2015 ubwo cyangaga guta muri yombi Perezida wa Sudani Omar el-Béchir, ushinjwa na ICC ibyaha byibasiye inyokomuntu, iby’intambara na Jenoside mu Ntara ya Darfour, ubwo yari yitabiriye inama y’Umuryango wa Afurika Yunze Ubumwe.

Icyo gihe urukiko rwa Pretoria rwari rwasabye ko Perezida Bashir atava muri iki gihugu, gusa Jacob Zuma yabirenzeho amwemererera gusubira muri Sudani.

Afurika y’Epfo ifashe iki cyemezo nyuma y’uko ku itariki 18 Ukwakira 2016, Perezida w’u Burundi, Pierre Nkurunziza na we yasinye ku itegeko ryo kuva muri ICC.

Si ibi bihugu byonyine kandi byagaragaje ubushake bwo kwivana muri uru rukiko kuko mu Nama ya 26 y’Umuryango wa Afurika Yunze Ubumwe, abakuru b’ibihugu bagaragaje ko bashyigikiye igitekerezo cya Kenya cyo kwitandukanya na ICC.
Uru rukiko rwakunze gushyirwa mu majwi n’abayobozi bo muri Afurika, bavuga ko rwibasira abanyafurika.

Ibihugu 34 byo ku mugabane wa Afurika, ni byo byashyize umukono ku masezerano ya Roma, yashyizeho uru rukiko.

Afurika y'Epfo itangaje ibyo kuva muri ICC nyuma y'uko Perezida Zuma yangiye gufata Bashir

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza