Kwamamaza

Afurika y’Epfo: Pasiteri wateye abakirisitu umuti wica udukoko ari mazi abira

Yanditswe kuya 22-11-2016 saa 10:44' na Evariste Nsengimana


Inzego zitandukanye muri Afurika y’Epfo zamaganye Pasiteri Lethebo Rabalago wateye abayoboke b’Itorero rye umuti wica udukoko (insecticide) wo mu bwoko bwa Doom ababwira ko ushobora kubakiza indwara zidakira nka Sida na Cancer.

Iyi nkuru yagarutsweho cyane nyuma y’amafoto yagaragaye ku mbuga nkoranyambaga, Pasiteri Lethebo Rabalago uyobora Itorero Mount Zion General Assembly rikorera mu Ntara ya Lipompo muri Afurika y’Epfo atera abakirisitu uyu muti mu maso no ku bindi bice by’umubiri ngo abakize indwara.

Pasiteri Lethebo Rabalago yatangarije BBC dukesha iyi nkuru ko yakoresheje uburyo budasanzwe ashaka gukiza abantu.

Yagize ati “Nateye uyu muti mu maso y’umwe mu bagore kubera ko yari afite ikibazo cyo kuribwa amaso, kandi yahise akira kubera ko yizeye imbaraga z’Imana. Doom ni izina ariko ushobora kuyitegeka guhinduka umuti.”

Bamwe mu bakirisitu batewe uyu muti batanze ubuhamya bavuga wabakijije.

Mu itangazo Sosiyete ikora Doom yashyize hanze, yasabye uyu muvugabutumwa guhagarika gukoresha iyi miti, kubera ko ishobora kugira ingaruka ku bantu kuko yakorewe kwica udukoko gusa.

Guverinoma ya Afurika y’Epfo yashyizeho Komisiyo yo kugenzura icyaba cyihishe inyuma y’ibi bikorwa.

Komisiyo ishinzwe guteza imbere no kurinda umuco, imyemerere n’imigenzo yamaganye iki gikorwa ivuga ko ari kibi ku buzima bw’umuntu inasaba ko uwumva uburenganzira cyangwa imyemerere ye byarengerewe kubiyimenyesha.

Ibikorwa nk’ibi bikunze kugaragara muri iki gihugu kuko hari ibyabanjirije ibi mu matorero yaho nko kurisha abakirisitu inzoka, ibyatsi, amabuye, indabo n’ibindi babizeza ibitangaza byo gukira.

Pasiteri Lesego Daniel wa Rabboni Ministries yategetse abayoboke be kunywa peterori, ndetse muri 2014 abasaba kurya ibyatsi n’indabo.

Icyo gihe kandi Pasiteri Penuel Mnguni wayoboraga End Times Disciples Ministries, ibitangazamakuru byise ‘Pasiteri w’Inzoka’ yategetse abakirisitu be kurya amabuye avuga ko yayahinduye imigati.

Uyu mugabo w’imyaka 25, watangije Itorero muri 2014, yanategetse abakirisitu be kurya inzoka n’imbeba avuga ko yabihinduye Chocolat ariko kuva icyo gihe yahise yirukanwa mu gace ka Soshanguve, gaherereye mu Majyaruguru ya Pretoria, aho urusengero rwe rwari rwubatse.

Pasiteri Lethebo Rabalago wateye abayoboke be umuti wica udukoko ari mu mazi abira
Pasiteri Lethebo Rabalago avuga ko Doom ishobora guhinduka umuti ukiza
Pasiteri Lethebo Rabalago yizera ko uyu muti ushobora gukiza abantu indwara zananiranye
Muri 2014, Pasiteri Penuel Mnguni yategetse abakirisitu be kurya inzoka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved