Kwamamaza

Afurika y’Epfo: Hagati ya Mata 2015 na Werurwe 2016, abantu 51 bicwaga buri munsi

Yanditswe kuya 4-09-2016 saa 09:32' na Ezechiel Mbananabo


Imibare y’ubwicanyi muri Afurika y’Epfo ikomeje kwiyongera aho raporo ngarukamwaka ya polisi ku byaha bikorwa muri icyo gihugu yashyizwe agaragara kuri uyu wa Gatanu yerekanye ko abantu 18 673 ari bo babaruwe ko baguye mu bwicanyi hagati y’itariki ya 1 Mata 2015 na tariki 31 Werurwe 2016.

Ugereranyije n’imibare yagaragaye mu gihe nk’icyo umwaka ushize, imibare yiyongereyeho 4.9% kuko yavuye ku bagera ku 17 805 baba 18 673, mu gihe ngo mu myaka ine ishize ubwicanyi bwiyongereho 20%.

Impuzandego y’imibare mishya y’uyu mwaka igaragaza ko habaye ubwicanyi ku bantu 51 buri munsi, nibura umuntu umwe yicwa buri minota 28.

Mu ntara ziza ku isonga mu kugaragaramo ibikorwa by’ibwicanyi harimo Natal ibarurwamo abishwe bangana na 3929, ikaba iherereyemo Umujyi wa Durban, ikurikirwa na Gauteng yabaruwemo ubwicanyi bugera ku bantu 3842, mu gihe akarere ka Pretoria na Cap y’Uburengerazuba habaruwemo impfu z’abantu 3649. Izi ntara zibarirwa mu icyenda zigize Afurika y’Epfo, zikaba zihariye abarenga kimwe cya kabiri cy’abantu bishwe mu gihugu.

Mu mwaka umwe gusa, umubare w’imodoka zibwe hakoreshejwe ubugizi bwa nabi wiyongereyeho 14.3%, aho imodoka 14 602 zibwe muri iki gihugu kirangwamo ubusumbane bukabije mu bukungu.

Mu kiganiro n’abanyamakuru kuri uyu wa Gatanu tariki 2 Nzeri 2016, Minisitiri ufite mu nshingano polisi muri Afurika y’Epfo, Nathi Nhleko yagize ati “ Dufite ibyo tugomba gukora ku kibazo gikomeye cya sosiyete. Icyo iyi mibare itubwira nk’Abanyafurika y’Epfo, ni uko turi abagizi ba nabi, kandi ko dufite umuco wamamaye cyane w’ubugizi bwa nabi.”

Yongeyeho ati “ Ntabwo ari ukwibaza icyo guverinoma ishobora gukora, ni ukwibaza icyo dushobora gukora".

Abaturage babayeho mu bwoba

Abaturage bo muri iki gihugu cyane abanyamahanga bafite ubwoba bwinshi cyane bashingiye ku bikorwa by’ihohoterwa byabakorewe umwaka ushize, aho bahohotewe n’abanyafurika y’Epfo kavukire, babaziza ko babatwaye imirimo.

Ubwo ryagiraga icyo rivuga kuri iyi mibare, Ishyaka ANC rya Perezida Jacob Zuma, na ryo ryatangaje ko abaturage mu gihugu babayeho mu bwoba nk’uko Jeune Afrique yabitangaje.

Ikigo gitanga amasomo y’umutekano (l’Institut d’études de sécurité (ISS), gikorera i Pretoria, cyagize kiti “ Tugomba gutangira gukora ibintu mu buryo butandukanye n’ubusanzwe. Icy’ingenzi ni ukugaruka ku bitera ubu bwicanyi, bishatse kuvuga kwegera urubyiruko ruri mu bibazo, kumenya ko abana babayeho mu mutekano, gukemura ikibazo cy’ibisindisha, intwaro n’ibiyobyabwenge.”

Ku ruhande rw’ikigo ISS, imibare mishya igaragaza uko ibyaha bihagaze, nta mpinduka nziza igaragaza kabone nubwo mu minsi ishize hashyizweho umuyobozi mushya wa polisi n’abandi bapolisi b’abofisiye 18 b’inararibonye mu myanya ikomeye.

Gusa imibare y’uyu mwaka igaragaza ko hari intambwe yatewe mu byiciro bimwe na bimwe. Mu mwaka ushize, umubare w’abakorewe ihohoterwa rishingiye ku gitsina wagabanutseho 3.2%, bingana n’abantu 51 895, nubwo ihohoterwa rikomeje kuba ikibazo gikomeye.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved